1233/2022-2023
Kolasib dated 13th July 2022: Vawiin khan ni hnih awh tur ‘Training on Integrated Financial Management Information System’ hawnna hun SIRD & PR, Kolasibah neih a ni a. Pu John LT Sanga, Deputy Commissioner chu khuallian niin Pu ZR Thafala, Principal, SIRD & PR chuan hun a kaihruai a. Kolasib district chhunga sawrkar pisa 52 atangin mi 2 theuh he training-a tel tur hian ruahman niin a nikhatna atan hian Office 27 an tel a ni.

Khuallian Pu John LT Sanga, Deputy Commissioner chuan khawvel changkanna ina a ken tel thiamna hrang hrangte chu zirchianga, a hmang tangkai hmasatu nih tum zel turin vawiin ‘Training on Integrated Financial Management Information System’ chhim tur a kalkhawmte chu a chah a. Office hrang hranga pawisa lut leh chhuak ziah fel kawnga thawktute hna chu hna pawimawh tak, thiamna bik neih ngai chi a nih angin IFMIS chuan nasa takin a puih tur thu a sawi. Office-a sum dawn dan leh a pek chhuah dan IFMIS hmanga enkawl a nih chuan a felfaiin a langtlang dawn hle a, Finance Department lam tan pawh hnathawh a sawtin hun lo la kal zel tur atan a sum hman dan ruahmanna kawngah pawh nasa taka a puih tur thu Pu John LT Sanga chuan a sawi a. He IFMIS hman tangkai kawngah Office dangte tan a entawntlak ni tur a hmang thiam hmasatu nih tum theuh turin khuallian chuan Training hawnnaah hian kalkhawmte a ngen bawk a ni.

Chawhma lamah hian IFMIS chungchang inhmelhriattirna leh hemi hnuai a thawktute ziahluh dan hrang hrang zirtirna hun Pi MS Dawngkimi, Support Engineer, A&T, Kolasib chuan a nei a. Chawhnu lamah IFMIS hnuaia Bill hrang hrang ziahluh dan entirna hun neih leh tur niin Pu Kevin Lalmalsawma, Treasury Officer, Kolasib hovin zawhna leh chhanna hun neih a ni dawn bawk a ni.