2727/2022-2023

Aizawl, the 18th November 2022: Vawiin khan Mizorama Private University awmchhun, ICFAI University Mizoram chuan Convocation vawi 10-na chu an Campus Audtitorium-ah an hmang a. He hunah hian Governor Dr. Haribabu Kambhampati, Visitor of ICFAI Mizoram ni bawk chu khuallian a ni.

Visitor phalna la hmasain Prof Y.R. Haragopal Reddy, Chancellor, ICFAI Mizoram chuan convocation hi a hawng a. Program bul tan nan Prof R.P.Vadhera, Vice Chancellor, ICFAI Mizoram hnen atangin inlawmna thuchah leh progress report of ICFAI Mizoram ngaihthlak a ni a.Hemi zawhah hian zirlai hlawhtling te chuan Vice Chancellor hnen atanga thutiam an lak hnuin Chancellor hnen atangin an Degree neih nemnghehna an dawng a ni. Convocation program-ah hian zirlai hlawhtling zinga ti thazual te thlanchhuan hnenah Governor leh Chancellor te chuan Gold Medal leh Silver Medal te an hlan nghal bawk a ni.

Governor Haribabu Kambhampati chuan zirlai degree nei thar te chu an hlawhtlinnaah a lawmpui thu sawiin an hmalam hunah hlawhtlinna an chan ngei theihna turin duhsakna a hlan hmasa a. Prime Minister Narendra Modi in India ram zirna kalphung thar mithiamte a buatsaihtir,  New Education Policy(NEP) 2020 pawimawhna leh a bik taka Mizoramin a mamawh chhan te a sawi chhunzawm a ni.

Governor chuan Mizoramah hian zirna kan kalpui laiah hian eizawnna nena inkaihhnawih thil a hranpaa zirtirna a tam lo hle a. Art subject lam leh subject tluangtlam lam zirtirna, tuna kan kalpui mekah tha thawkhat mah ila, hmasawnna zawng zawh tur leh chhawrtlak mithiam chherchhuak tur erawh chuan duhthu a sam tawh lo a ti. A tam thei ang berin vocational education leh skill development lam te kan zirlai te kan zirtir a ngai tawh a. Hna zawng tura zirtirna pek lam aiin midangte chhawr thei tura mithiam, mahni kutkea bultan thei leh an hlawhtlin tak tak hma atanga midang te tana hna thawh tur siam thei mi tam zawk chher chhuah kan tum tur a ni a ti. Mizoram thalaite chu a tlangpuiin saptawng an thiamin an tawng pawh a nalh tih sawiin hei hi skill pawimawh tak a ni a. India ram mai ni lo, ram pawnah thleng Mizo thalaite hian hna an hmu thei a; engemaw thiam bik emaw thawh theih bik erawh an neih a ngai a, hemi atan hian skill development lam leh vocational education lam kan hawi nasat a ngai a ni a ti.

He hunah hian Governor chuan Mizoramah Central Scheme tha tak tak dawngte an tlem chhan chu heng scheme  hrang hrang te chungchangah inzirtirna pekchhuah a that tawk loh vang a ni tih a sawi a. Hei hi pawi a tih thu te, hun remchang a neih apiangin hemi chungchangah sawrkar official leh banker te tang tura a ngen thin thu a sawi a. Central sawrkar atanga dawn theih social security scheme tha tak tak leh sawrkar tanpuina te chu a dawng tur dik tak la dawng lo tam tak ten an dawn theihna turin mithiam rawn chhuak thar te pawhin hriat chian an tum a, beneficiary te hnenah zirtirna an pek a ngai a ni a ti.

Central sawrkar hnuaia hmalakna pakhat Pradhan Mantri TB Mukt Bharat Abhiyan, kum 2025 hmaa TB natna umbo chungchang a sawi a. He scheme hnuaiah hian ei leh in tha mamawh, TB natna vei te chu Nikshay program hmangin online kaltlangin pawisaa tanpui theih an ni a ti a. He rawngbawlnaah hian mi thahnem ngai te rawn tel zel turin sawmna a siam a ni. (Governor, Health Minister leh mi thahnem ngai tlem azawngin TB vei engemaw zah tan kum khat chhunga chaw hrisel  leina tur pawisa an thawh a ni).

Full speech of Governor: https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-10th-convocation-of-icfai-university-mizoram-at-icfai-university-auditorium-on-18th-november-2022

Prof. Y.R. Haragopal Reddy, Chancellor, ICFAI Mizoram pawhin convocation puala thuchah a sawi a. Chancellor atana ruattu Governor chungah lawmthu a sawi a. ICFAI University Mizoram hmasawnna tura Governor in theihtawp a chhuah zel chu a thlamuan thlak hle a ni a ti. Chancellor chuan  ICFAI Mizoram hmasawnna tura kawng tinrenga phurpuia, an mamawh thlen te lo tihhlawhtlinsak zeltu Chief Minister Pu Zoramthanga hnenah pawh lawmthu a sawi bawk a ni. ICFAI Mizoram tihhmasawnna tura mawhphurhna sang ber pek a ni chu a tan chona hmachhawn phurawm tak a ni tih sawiin he university hmasawn zelna tur hian a theihtawp a chhuah zel dawn tih a sawi a. Vawiina degree thar nei te chu an hlawhtlinnaah a lawmpui tih sawiin ICFAI Mizoram tana palai hna thawktu ni chhunzawm a, he university in hmasawn zelna atana mi tangkai ni chhunzawm turin a sawm a ni.

Prof R.P.Vadhera, Vice Chancellor, ICFAI Mizoram in report a pek dan chuan ICFAI University Mizoram hi ICFAI Society, Hyderabad chuan tihlen zel a tum a. Zirna atan thil thar hmanraw tha tak tak dah belh tum a ni a, course thar engemaw zah zirtir a ni dawn a, zirtirtute leh staff te pawh lak belh a ni dawn a ni. Tunah hian classroom tam zawk chu LCD  projector a thuam vek a ni tawh a. Class room pawn lama subject thenkhat tana practical class lakna tur bik lab, room, station leh a dang te siam belh a ni mek a. Tunah hian PG program 10(MBA, MSW, M.Com, MA Pol. Sci., MA Eng., MA Edn., MA Hist., M.Sc. Geog, MA Eco., MA Mizo & Cultural Studies) leh UG program 7 (BBA, BSW, BCA, B.Com, BBA-H & T, BA (Eng), BA (Geog)) te chu Faculty of Management, Faculty of  IT leh Faculty of Humanities & Social Sciences hnuaiah kalpui mek a ni.

ICFAI Mizoram atang hian kumtin graduate 250-300 an chhuak thin a. Kuminah erawh chuan Graduate 98( 75 PG & 23 UG) chiah an awm a. Hei hi a chhan chu 2019-22 UG program leh 2020-22 batch PG Programs a admission la an tlem vang a ni. Tunah chuan ICFAI University Mizoramah hian admission la rawn tam leh tawhin zirlai 618 an awm mek a ni. BCA-Artificial Intelligence & Internet of Things, BCA-Cyber Security leh  BCA-Data Science from 2023-24, bakah  Ph.D. program pawh 2022-23 atangin tan a ni dawn bawk a ni. NAAC hnenah endik  an nih theihna turin an inpuah chah mek a. NIRF Ranking a tel pawh an tum mek bawk a ni.

Vawiina zirlai ti thazual lawmman dawngtute hi Gold Medal dawngtu 14 leh Silver Medal dawngtu 13 an ni a. Dr David Lawmzuala, Registrar chuan lawmthu sawiin Convocation hi khar a ni.