2929/2022-2023

Aizawl, the 3rd December 2022: Governor Hari Babu Kambhampati chuan Silchar - Sylhet Festival hawnna nizan khan a kaihruaia; a ni hnihna inkhawm vawiina neih pawh a kaihhruai nghal.

Hawnna inkhawmah hian Governor Hari Babu Kambhampati chu uaptu a ni a. Pu G.Kishan Reddy, Union Minister for Culture, Tourism & DoNER leh Dr AK Abdul Momen, Minister for Foreign Affairs, Bangladesh te chu khuallian an ni a. Pu Parimal Suklabaidya, Assam Transport Minister leh Pu Mohammad Mustafizur Rahman, High Commissioner of Bangladesh to India te chu khualzahawm an ni thung.

Bangladesh palaite leh India mi pawimawhte intawhkhawmnaah hian Governor Hari Babu Kambhampati chuan thu a sawi a. Silchar leh Sylhet khawpui te chu insumdawntawnna bakah culture ang hawi pawha tunhma atanga inzawmna nghet nei tawh tih a sawi a. He inkungkaihna hi ram pahnihte inthianthatna tinghettu atan hman kan duh a ni a ti. India leh Bangladesh chu tunhma atang tawh thian tha an ni tih sawiin he inlaichina hi kawng hrang hrangah hlawk taka hman tangkai zel ni se tha a tih thu a sawi a ni. Bangladesh atanga sumdawng lokal te pawh India hmarchhak lamah an sumdawnna huang rawn zauh zel turin a sawm bawk a ni.

India in Act East Policy chak takin a kalpui mek a. He hmalaknaah inkalpawhna tha ngaihpawimawh a ni a. Tunah MEA in KMMTTP project hmangin Mizoram chu India hmarchhak leh Kolkata lawngchawlhna kawngpuiah a siam dawn a. He mi project ngaihtuahna nen Bangladesh sawrkar leh sumdawng te chu Mizoram lam lo hawi tel turin a sawm bawk a ni.

Dr AK Abdul Momen, Minister for Foreign Affairs, Bangladesh chuan India sawrkar leh Bangladesh inlaichinna chu tunhma atangin a tha tawh a. Tunah phei chuan economy thangchak ber pahnih an nih tawh avangin ram pahnihte inlaichinna leh insumdawntawnna hi khawvel huapin a pawimawh tawh a. India tan Bangladesh chu South Asia a sumdawnna kawnga a thawhpui lian ber a ni a. Bangladesh tan pawh India chu khawvel pum huapa a sumdawnna kawnga a thawhpui(business partner) lian ber dawttu a ni mek a ni a ti. Bangladesh in sumdawnna kawngah tan a la mek a, India hmarchhak state te nena an sumdawnna phei chu nasa taka tihlen a tum mek a ni a ti.

Silchar - Sylhet Festival 2022 hi Police Parade Ground Silchar-ah neih a ni a. India leh Bangladesh ram ten insumdawn tawnna lian zawk leh ram pahnihte inlaichinna tinghet zual tura he hun hi buatsaih a ni.

Hawnna inkhawmah hian Dr Rajdeep Roy, MP, Silchar hnen atangin palaite inlawmna thuchah ngaihthlak a ni a. Hemi hnuah hian Khuallian pahnih te leh khualzahawm te hnen atangin thuchah ngaihthlak a ni bawk.

Tun tuma neih, Silchar-Syhlet Festival hi a vawikhatna a ni a. India Foundation leh Ministry of Cultural Affair te tangkawp a buatsaih a ni a. He intawhkhawmna a tel tur hian Bangladesh atangin sumdawng leh  politician te an zavaiin mi 100 chuang Bangladesh Foreign Minister hian a rawn ho a ni. Vawiinah a ni-2-na program neih chhunzawm a ni a. He hunah hian Governor Hari Babu Kambhampati chu uaptu a ni a. Dr AK Abdul Momen, Minister for Foreign Affairs, Bangladesh chu khuallian a ni a. Assam Forest Minister leh Bangladesh High Commissioner to India te chu khualzahawm an ni thung.