2928/2022-2023

Aizawl 3rd December 2022: Nizan khan Luangmual-a Geology & Mining Directorate kawtah Geology & Mining Minister Dr.R.Lalthangliana hovin department meeting neih a ni a. He hun hmanpuitu Geology & Mining Minister Dr.R.Lalthangliana chuan Geology & Mining department hi department pawimawh tak a nih thu a sawi a, kha chen Minister a nih ve hnuah a vawikhat enkawlna a nih thu a sawi. Covid-in hun rei tak min tibuai a, duh angin hma kan la chak thei lova, chuti ni lo se chuan Geology & Mining department pawh hian nasa takin hma a sawn tawh ang a ti.

Dr.R.Lalthangliana chuan, October ni 31, 2022-a Nagaland-ah North East Geology & Mining Ministers' Conclave, ama Chairman-na hnuaiah an neih chungchang leh 2022 September ni 9 leh 10-a Hyderabad-a National Mines Ministers' Conference an neih thu a sawi a. Khatah khan Minor minerals (lung, balu, etc.) enkawl dan hi NE State zawng zawngah siam vek ni se, hei hi EF & CC Dept. nena harsatna a awm loh nan Geology & Mining kuta dah pumhlum a nih theih nan State tin hma la turin ngen an rel thu a sawi. Pu Pralhad Joshi, Hon'ble Minister, Parliamentary Affairs, Coal & Mines chuan kha Conference-ah khan financial assistance Rs 5.0 crore chu NE state ten mineral haichhuahna leh zawnchhuahna tura infrastructure lam tih changtlunna atan pek nghal a tiam a, hemi atan hian proposal siama thehlut turin Central sorkar chuan a rawn hriattir tawh a ni, a ti bawk.

Orissa-ah phei chuan mining atangin revenue cheng vbc 50000/- (vbc singnga) te an lalut a, Central sorkar puihna pawh an mamawh tawh lo, mining lam hi kan thawh that chuan Zoram hmasawnna min thlen theitu a ni. Bangladesh Commerce Minister nen kan indawr khan hmarcha, sawhthing, aieng tih vel mamawh tho mahse, lung an mamawhna a nasa a, Bhutan atang tein an lalut a, kan Lungte hi an it em em a, nakin lawkah chuan lung atang hian sum hnar tha tak kan la nei dawn a ni. Sorkar department hian post thar a siam theih rih loh rual hian, kan sum hnar lakluhna ber tur thawktu mining bikah chuan post thar siam turin Cabinet-ah vawi hnih ka thlen tawh a, thawhpuite pawh an inhawng hle a ni. Thawktu kan indaih chuan tun ai hian kan thawk chhuak nasa ang. Sorkar department hi chak taka kal tur chuan thawktu indaih a ngai a. Kan thawh chuan Pathianin mal min sawm ang a, ka hmu bawk ang, Minister, Dr.R.Lalthangliana chuan a ti bawk.

Tunah hian Geology & Mining department hnuaiah hian thawktu 46 vel chauh an awm a. Heti chung hian kumina revenue an chhun luh hi cheng nuai 600 vel lai a tling a ni. He hun hi Geology & Mining Director Pu Lalthazuala chuan a kaihhruai a ni.