2927/2022-2023

Lunglei the 3^rd December, 2022 – Kum 2009 atanga kum hnih dana sem thin Vulmawi Award 2022 chu nizan khan Saikuti Hall, Lungleiah sem a ni. Lunglei HPC Vice Chairman Pu Lawmawma Tochhawng in a hmanpui a ni.

Vulmawi Award 2022 ah hian Category 22 hnuaiah award sem a ni a. Music lam category hrang hrang hnuaiah Award pek chhuah a nih bakah Best Film (Nukawki Pasal), Best Youtuber (Zo Inspiration), Best Announcer (PC Lalremruati DDK), Writer of the Year (Lalhruaitluanga Chawngte), Sportsperson of the Year (Male – Lallianzuala Chhangte, Female - Lalremsiami), Entertainer of the Year (Mastea) award te hlan an ni. Vulmai Award 2022 Lifetime Achievement Award dawngtu Revd H. Killuaia hnenah khuallian Lunglei HPC Vice Chairman in award a hlan a. Jeremy Lalrinnunga hnenah Special Award hlan a ni bawk.

Lunglei HPC Vice Chairman Pu Lawmawma Tochhawng chuan hun rei tak atanga lo kal pui tawh, Mizoram pum huap leh ngaih hlut hlawh em em Vulmawi Award neih chhunzawm zel a ni chu a lawmawm takzet a ni tiin musician-te, entertainment lama eizawngte, infiammite leh ziakmi te chawimawina ropui tak buatsaih thintu Vulmawi Award Organizing Committee te chungah lawmthu a sawi a. Nominee-te leh award dawngtute a lawmpui thu sawiin an kal zelna turah duhsakna a hlan a. Vulmawi Award chu Mizo thalai talent nei tha tak tak te fuih thar tu leh an hmalaknaa phur tharna pe tu anih ngei a beisei thu a sawi bawk.

Vulmawi Award Organizing Committee te chu – Chairman – Pu Johnny Zoramthanga, Rahsiveng; Chief Organizer – Pu K. Lalrinpuia, Ramthar; Vice Chairman – Pu Lalduhawma Hnamte, Zohnuai; Secretary – Pu Lalrinmawia Punte, Ramthar; Asst Secretary – Pu Lalramliana, Salem Veng te an ni.