2926/2022-2023

Champhai, the 2nd December, 2022: Hunpui Christmas leh Kumthar lo thleng tur denchhena ruihhlo do beihpui thlakna Special Drive kalpui mek zelah Excise & Narcotics Department, Champhai leh Khawbung Branch YMA tangkawp buatsaihin vawiin chawhnu dar 1 khan Khawbung Community Hall-ah ruihhlo hman khawloh laka inven dan inzirtirna, Anti-Drugs Awareness Campaign chu 'Say NO to drugs and YES to life' tih thupui hmangin neih a ni.

He hun hmanpuitu Pu Vanlalvura Ralte, Asst. Comissioner of Excise & Narcotics Department Champhai chuan ruihhloin thalaite a run nasat thu sawiin, "Tunah hian ruihhlo lut leh tawlh dan supply reduction kan beih mek hi a tawk zo tawh lova, tleirawlte leh a la ti chhin ve ngai lo te hnenah ruihhlo ti ve lo tura zirtir leh hrilhhriat  demand reduction lamah kan lak nasat a ngai tawh hle a ni," a ti a. Kalkhawmte chu ruihhlo laka inthiar fihlim tur leh midangte zirtirtu nih tum theuh turin a chah a ni.

He hun hi Pu Lalchhanhima Hnamte, President Khawbung Branch YMA chuan kaihruaiin Upa R. Lalrinliana'n hunserh a hmang a. Pu J. Laltlanmawia, SI, Excise & Narcotics Department Champhaiin ruihhlo chungchanga hriattur tulte powerpoint presentation hmangin a zirtir a. Anti-Drugs Awareness Campaign-ah hian mi 230 vel an tel thei a, hun hlawkthlak tak hmanho a ni.

Ruihhlo hman khawloh leh a nghawng thalote zirtirna kalpui mek zelah Excise & Narcotics Department Champhai chuan hma a la zel a, hunpui vuakveta Anti-Drugs Awareness Campaign Special Drive kaltlang hian District chhung hmun thlan bikahte zirtirna an nei chho zel a. Special Drive kaltlang hian Champhai Vengthlang, Hnahlan leh Khawbungahte program neih a ni tawh a, ruahman dan chuan Anti-Drugs Awareness Campaign hi December ni 4, 2022 chawhnu dar 1 hian Sesih Community Hall-ah neih tum a ni.