2925/2022-2023

Kolasib dated 2nd December 2022: Vawiin khan Parish Hall, Venglai, Kolasibah Mizo Cultural Club, Sub-headquaters, Kolasib buatsaih, ‘Mizo Hnam Lam Intihsaikna’ 2nd Kolasib MLA Running Trophy 2022 neih niin Dawr Veng, Bilkhawthlir ten lawmman pakhatna an la a. He hun ah hian Pu K.Lalrinliana, Minister of State, Food, Civil Supplies & Consumer Affairs department, Kolasib Assembly Constituency bialtu MLA chu khuallian niin Pu John LT Sanga, Deputy Commissioner chu khual zahawm a ni.

Khuallian Pu K.Lalrinliana chuan Mizo hnam anga min phuarkhawmtu pawimawh tak chu kan hnam ziarang a nih thu sawiin hnam humhalh nan heng ziarang, inthuamna, hla leh lam te thangthar zawk zirtir thin a tul thu a sawi. Hnam fing apaingin mahni hnam ziarang humhalh leh chawisan an ngaih pawimawh thu Minister chuan sawiin Mizo hnam ziarang inzirtirna leh humhalhna tur a Mizo Cultural Club hmalakna chu lawmawm a tih thu a sawi bawk a ni.

Khual zahawm Pu John LT Sanga, Deputy Commissioner pawhin mahni hnam ziarang theihnghilh a pawi thu leh heng hnam ziarangte hi hnam dang lak a kan danglamna a nih angin chawi nung zel tur a hmalak a pawimawh thu a sawi.

Pu C.Lalrinkima, President, MCO, Sub-headquarters Kolasibin kalkhawmte lawmna thu a sawi a, Pu John Saikhuma, Vice President, MCO General Head-quarters chuan MCO, Kolasibte hmalakna chu entawntlak a tih thu leh he inelnaa telte chu mizo hnam ziarang humhalh nana hmanraw pawimawh tak an nih thu a sawi. Pu R.Lalnuntluanga, Secretary-in report pein Pu John Lalramthanga, Vice President-in lawmthu sawina hun a hmang bawk a ni.

‘Mizo Hnam Lam Intihsiakna’ 2nd Kolasib MLA Running Trophy 2022-ah hian Kolasib Assembly Constituency chhung atangin club 14-te he inelnaah hian an tel a. Cheraw (Buhzai) ah inelna hi neih niin MCO Dawr Veng ‘B’, Bilkhawthlir ten pakhatna lawmman lain MCO Dawr Veng ‘A’, Bilkhawthlir ten lawmman pahnihna an la a, MCO, New Diakkawn ten lawmman pathumna an la bawk a ni.

MCO, Sub-headquaters, Kolasib hi ni 23, February 1999 khan din niin khaw pasarih atangin club 23 inziaklut an awm mek a, Institution Club pali an awm bawk a ni.