No.4348/2021-2022

Aizawl, the 22nd March 2022: Vawiin chawhma khan Durbar Hall, Raj Bhavan-ah Governor Hari Babu Kambhampati chuan Pu Vanlalngaihsaka IAS(rtd) chu Member, Mizoram Public Service Commission (MPSC) atan rinawmna thu tiam tirin a lalut.

MPSC member thar lakluhna hi Pi Renu Sharma, Chief Secretary chuan kaihruaiin he hunah hian Member, MPSC atana Pu Vanlalngaihsaka IAS(rtd) ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan Pu Vanlalngaihsaka IAS(rtd) chu rinawmna thu tiam tirin Member, MPSC atan a la lut a ni.

MPSC member thar lakluhna hunah hian Chief Minister Pu Zoramthanga, Speaker Pu Lalrinliana Sailo, Home Minister Pu Lalchamliana, Official te leh sawmbik mi thenkhat te an tel a ni.

Pu Vanlalngaihsaka hi 15 August, 1962 khan Shillong Military Hospital, Shillong-ah a piang a. A nu leh pa te chu Subedar Chalkunga (L) leh Pi Lalbiakveli te an ni. A nupui Pi Lalrinpuii nen fapa 2 leh fanu 4 an nei a; Tatkawng Veng, Chaltlang-ah an cheng mek a ni. Pu Vanlalngaihsaka hi thiamna lamah chuan B.A. Pol.Sc. (Hons) degree nei a ni a. Kum 1991 khan Mizoram Civil Service-ah a in ziak tlinga, kum 2015 khan Indian Administrative Service (allotted 2007) ah hlankai(promoted) a ni leh a ni. Pu Vanlalngaihsaka IAS(rtd) hi mahni hna atana mi in pe tak a ni a. Sawrkar hna a thawh chhung hian mawhphurhna leh dinhmun pawimawh tak tak a lo chelh tawhin tawnhriat a ngah hle a ni. Vawi 4 lai District hrang pathum – Aizawl(1), Champhai(1) leh Mamit(2) ah te Bawrhsap a ni tawh thin a. Kumin March 11 khan Voluntary retirement in a hna a chawlhsan a. Hemi ni thleng hian Mizoram sawrkarah Secretary nihna chelhin Home Department leh DM&R Department te a enkawl a ni.