No.4347/2021-2022

Aizawl 22nd March 2022: Vawiin khan Serlui Assembly Constituency bialtu MLA Pu Lalrinsanga Ralte, Vice Chairman, Rubber & Allied Crops Development Board chuan a bial chhung Thingthelh a Health Clinic Centre thar a hawng. Bialtu MLA chuan Thingthelh Health Clinic Centre hawn thar tak a thawktu tur Health Workers hi MLA Fund atanga ruahman a nih tur thu a sawi.

Serlui AC bialtu MLA chuan a bial chhung khaw hrang hrang a Health Clinic Centre hawn thar a ni thei chu lawmawm a tih thu sawiin Thingthelh khaw mipuiten hriselna kawng a hmasawn nasa zawk an hmuh theih nan tangkai tak a an hman ngei a beisei thu a sawi a. Health Clinic Centre chu sawrkar ta a nih rualin a hmangtu leh a chhawrtu ber tur chu khawtlang mipuite an nih avangin a hmunhmate duat leh uluk tak a enkawl turin kalkhawmte a chah. Covid hrileng avanga ram pumin harsatna a tawh mek avangin thawktu dah mai a harsat thu sawiin MLA Fund hmanga thawktu hlawh chu ruahman phawt a nih tur thu leh Health Clinic Centre hawn thar te chu a tul anga tihchangtlung zel a nih tur thu Pu Lalrinsanga Ralte chuan a sawi bawk a ni.

Rubber & Allied Crops Development Vice Chairman chuan hrileng avanga ram pum a harsatna hrang hrang hmachhawn mek a ni chungin Chief Minister Pu Zoramthanga kaihhruaina hnuai ah Sawrkar chuan mi rethei leh harsa zawk ten hamthatna an neih ve theihna turin theihtawp an chhuah zel tur thu a sawi a. Sawrkar kum tharah chuan kuthnathawktuten hmasawnna kawng an zawh a, eizawnna ngelnghet nei tur a bul an tan ve theih nan SEDP sem tum a hmalak mek a nih thu a sawi bawk a ni.

February thla khan Serlui bial chhung - Rengtekawn, N.Chhimluang leh Saihapui 'V' a Health Clinic Centre tharte chu bialtu MLA hian a lo hawng tawh a. Heng khaw pathum a thawktu tur Health Workers te hlawh hi bialtu MLA chuan MLA Fund atangin a ruahman sak vek a ni.