No.4376/2021-2022

Aizawl, the 23rd March 2022: Governor Hari Babu Kambhampati chuan vawiin khan Raj Bhavan-ah Pu R. Lalzirliana, Power & Electricity Minister a kawm a. He hunah hian Mizoram in Kawlpetha a mamawh tam chhoh dan te, a siam chhuah kawnga harsatna awm mek te sutkian dan tur leh Mizoram mamawh phuru tur zat tal Kawlpetha siam chhuah dan tur chungchang te an sawi dun a ni.

Governor Hari Babu Kambhampati chuan Power Minister R.Lalzirliana hnenah hian Mizoramah Kawlpetha siam kawngah sawrkarin policy a nei em tih te, hydel project kalpui a nihin Mipui leh kil dang atangin dodalna emaw phurpui vak loh na te a awm thin em tih te a zawt a. Mizoram tan hmasawn turin Power a intodelh phawt a tul nia a hriat thu te sawiin Tuiluang chakna hmanga current siam ringawt bakah Nizung chakna hmanga current siam kawngah mipui kan phur thar a tul hlea a hriat thu te a sawi a ni. Kan state in power project te neih belh tumna a neih phawt chuan a theihna zawnah theih tawp chhuah turin a in kau reng a ni tih Power Minister chu a hrilh a ni. Governor chuan tuna power indaihlohna thleng mek te a ziaawm theih nan power sub-station awm mek te bul hnaiah te Mini-Solar Plant din zel turin Power Minister leh a thawhpuite chu a ngen a. Roof Top Solar plant bunna tura sum leh paia harsnatna nei lo tur customer zawng zawng te chu P&E hnathawk ten Roof Top Solar plant hmang tel turin fuih se; a thatna leh Current chhit man tih hniamna a nih dan te chipchiar taka hrilh chhunzawm an ngai a ni a ti.

Power Minister R.Lalzirliana chuan sawrkar leh mipui ten Kawlpetha intodelh kan duh vek a; kan harsatna erawh chu project khawih na tur sum lama harsatna avang a ni a ti a. Hydel Project siamna turin sum mamawh a lian tham thin bawk sia; hmalak chak a awlai lo hle a ni a ti. Hydel Project siam tumna a awm phawt chuan Mipui lam atanga dodalna a awm a rinloh thu pawh Governor hi a hrilh bawk a ni.

Mizoram chhungah hian lui luang chakna hmanga electric current siam chhuah theih zat chu 4000 MW lai a ni tih sawiin tuna Mizoram chhunga electric current siamchhuah chu nikhatah 5 MW atang 10 MW thleng a nih thu a sawi a ni. Mizoramin nikhatah 144 MW vel electric current a mamawh tih a sawi a; Mizoram chhunga tlemte siamchhuah bak zawng chu pawnlam atanga chawkluh a ni a ti a. Mizoramah Kawlpetha tam zawk siam chhuak turin sawrkar chuan sum indaihlohna karah pawh theih tawp a chhuah mek a. Tunah hian state sawrkarin ama puala a siam ve, Ministry of Power in a phalsak chin - 24 MW ve ve pechhuak thei tura chhut Tuirini leh Tuivawl Mini-Hydel Project te pawh buaipui mek a ni a; hnathawhna tur sum ngaihtuah mek niin Chief Minister pawhin he hmalakna hi tha a tih pui tih a sawi a ni.

Hydel Project lian zawk te siam a nih theihna turin Central Public Sector Units(CPSUs) te thawhpui pawh ngaihtuahnaah a awm mek tih a sawi a. Tuivai Hydel Project(210 MW leh Mat – Sekawi Hydel Project (76 MW) te hi siam turin thuitak lo kalpui tawh te an ni a; thar thawh leh dan tur te pawh ngaihtuah chhunzawm a ni ang a ti.

Governor ngenna angin Pu H.Lalengmawia, Commissioner & Secretary, Pu F.Lalrinpuia, Engineer in Chief leh Pu J.H.Malsawma, Superintending Engineer(P) te chuan Mizoram Sawrkar hnuaia P&E project kalpui mek te, hmachhawp te bakah tuna project pawimawh tak tak 6, Ministry of Power in a pawmpui tawh Ministry of DoNER a tang mek chungchang te an sawi fiah a. Ministry of DoNER in project pawimawh thawhna tur sum, 10 % Gross Budgetary Support atanga a rawn pek tur te hi Rs.24 Crore a ni a; sanction a nih thuai theih nan Power Minister chuan Governor chu a theih tawp chhuahpui tur leh Central sawrkar dawr pui turin a ngen nghal bawk a ni.