No.4063/2021-2022

Aizawl, the 21st February 2022: Vawiin chawhnu khan Governor Hari Babu Kambhampati leh Mizoram Presbyterian Kohhran hruaitute chu Raj Bhavan-ah an inkawm a. Governor leh Mizoram Synod hruaitute inkawmnaah hian mipui vantlang tana hmalakna tangkai tur leh tunlai Mizoram chhunga thil thleng pawimawh deuh te sawiho a ni.

Governor Hari Babu Kambhampati chuan Mizoram chhunga Kohhran leh Tlawmngai pawl hrang hrang ten mipui vantlang hmasawnna atana sawrkar tha taka an thawhpui thin avang te, anmahni senso nena state hmasawnna atan an luangchhuak thin chu state danga NGO leh sakhaw dang vuantute tan pawha entawn tlak leh chhuanawm a ni tih a sawi a. Hripui leng avanga harsatna a thlen lai te, buaina lian tham deuh a thlen chang te, sakhaw hrang hrang betute inkarah inunau na a awm theih na atan leh miharsa te tanpui kawngah Kohhran ten theih tawp an chhuah thin chu ropui a tih thu sawiin sawrkar an thlawpnaah lawmthu a sawi bawk a ni.

Governor chuan Mizoram a awm chhung reiloteah mi chi hrang kawm tawhin hmun hrang hrang a tlawh tawh thu a sawi a. Heng atang hian Mizoram mipui mimir tam zawk hian Central Scheme tha tak tak miharsate chawikanna atana kalpui mek te an hriat loh bakah an dawng lo tih a hmuh thu a sawi a. Central Welfare Scheme tam tak te hi Mizo mipui ten dil nachang an hriatloh chhan chu zirtirna pekchhuah that tawk loh avanga an hmelhriatloh vang a ni a ti. Theihtawpa tan lak a la ngaih thu a sawi a, nodal department te leh Bank lampang te pawh hemi chungchang hi la sawipui a tum thu a sawi a. Helam hawia Awareness campaign atan kohhran hruaitute chu a mi rin berte zinga mi an nih thu a sawi a. Tunah hian welfare scheme tha tak tak Mizoram mipui ten kan hriatloh avangin kan la dawng lo a; he awareness campaign pawimawh takah hian kohhran a rawn pen chhuah phawt chuan hma kan sawna, Central Welfare scheme kaltlanga mi tam zawkin malsawmna an dawn ngei Governor chuan a rin tlat thu a sawi a ni.

Mizoram Synod hruaite chuan Mizoram sawrkar leh Kohhranho te chu englai pawha Mizoram hmasawnna tura lungrual taka thawkho thin an ni tih Governor hnenah hian an sawi a. Mizoram chhunga remna leh muanna a awm theihna atan te, zirna tih hmasawnna, inthlanna thianghlim a awm theihna tura hmalaknaah te, mipui vantlang tana luanchhuah kawngah leh sawrkar thlawp a ngaihna laiah te kohhran ten theih tawp an chhuah chhunzawm zel tih an sawi a ni. Mizoram Synod chuan mipui vantlang rawngbawlna atan Office hran neiin Synod Social Front kaltlangin rawng an bawl chhunzawm mek zel tih an sawi a ni. Synod hruaite hian Kristian ten India ram hmun thenkhata harsatna an tawh chungchang te, ICFAI chungchang, Refugee chungchang, Covid-19 chungchang, Danlova bungraw tawlh chungchang te bakah Skill Development chungchangte pawh Governor hi an sawipui bawk a ni.

Tunhnaia hrileng avanga Mizoramin harsatna a tawh lai pawhin Mizoram Presbyterian pawhin miharsate leh tanpui ngaite pualin local church kaltlangin tanpuina sumfai a theh chhuak thin tih an sawi a. Mizoram Presbyterian Kohhran 118 ten report an thehlut a; report thehlut lo kohhran engemaw zat an awm bawk tih an sawi a. Report a tarlan dan chuan Mizoram Presbyterian Kohhran 118 te chuan March leh December 2020 inkar khan tanpuina sumfai Rs 436,65,288/- an thawh a, January leh November 29, 2021 inkarah Rs 691,45,216/- an thawh leh bawk a; March 2020 atanga November 2021 chhunga Tualchhung Kohhranin Relief atana a senso belhkhawm chu Rs 11,28,10,504 a tling a ni. Synod sumpui atangin Rs 58,15,000/- pek chhuah leh niin a pumpuia Mizoram Presbyterian Kohhran 118 leh synod sumpui atanga tanpuina atana senso zat chu Rs 11,86,25,504/- a ni. Heng te hi CM Relief Fund ah te chhunluh a nih bakah VLTF/LLTF hnena hlan te, chhungkua/mimal tanpuina atan te bakah CCC/4C/Camping Centre/ ZMC,etc hnenah te hlan a ni.

Governor leh Mizoram Synod hruaitute inkawmnah hian Synod hruaitute an tel kim hle a. Rev. Dr. Vanlalnghaka Ralte (Moderator), Rev. C. Zorammawia (Sr. Exe. Secretary), Rev. V. L. Luaia Hranleh (Exe. Secretary), Rev. Dr. K. Lallawmzuala (Exe. Secretary), Rev. Z. D. Lalhmachhuana (Synod Secretary Sr.), Upa B. Lalhmunliana ( Synod Secretary Jr.), Rev. Lalsangbera (Synod Statistician) leh Rev. P. C. Pachhunga (Finance Officer) te an tel a ni.