No.4064/2021-2022

Aizawl, the 21st February 2022: Lunglei District-a Covid-19 hrileng dinhmun thlirho tur leh hmalak zel dan tur ngaihtuah ho turin vawiin khan Lunglei DLTF on Covid-19 te chu an Chairman Lunglei DC Pu Kulothungan A kaihhruaiin Lunglei DC Conference Hall-ah meeting an nei.

Lunglei District chhunga zan dar 9:00 leh zing dar 4:00 inkara pawn chhuah khapna (zan curfew) thupek lo chhuah tawh chu tih tawp ni se tih vawiin meeting chuan a rel a. Hemi bakah hian zan inkhawm phal; public park leh picnic spot hawn phal; lui kal, trekking, hiking adventure sports etc phal; sports inelana leh tournament-te entu awm lova phal; gym leh spa hawn phal; mipui punkhawm (anniversary, birthday, thian/chhungkaw chaw eikhawm etc) VLTF emaw Incident commander hriatpuia phal; restaurant-te a hmuna leng zat chanve (50% seating capacity) aia tam lova hawn phal te vawiin meeting-ah hian rel thar a ni.

Lunglei DC & DLTF Chairman Pu Kulothungan A chuan inkhuahkhirhna te tlema thlah zalen anih avangin Lunglei District mipuite inthlahdah lo tura chahin mitinten Covid-19 hrileng chenpui thiam kan zira, kan fimkhur chhunzawm zel a tul takzet a ni, a ti.

H&FW Department, Lunglei District chhinchhiah danin vawiin February ni 21, 2022 thlengin Lunglei District-ah Covid-19 test 1,45,284 neih tawh niin 18,180 (12.51%) positive hmuhchhuah an ni a. Covid-19 avangin Lunglei District ah mi 40 (mipa - 29 leh hmeichhia - 11) ten nunna an chan tawh bawk a ni. Covid-19 vei enkawl discharge tawh mi 16,837 niin recovery rate hi 92.61% a ni.

January 2022 khan Covid-19 case 2405 hmuhchhuah a ni a. February thla chhung hian case 3679 hmuhchhuah tawh niin February positivity rate hi 27.99% a ni mek a ni.

Lunglei Medical Superintendent Dr SR Ngurchamliana chuan DCHC ah khum 32 (CHS -28 leh UPHC Sazaikawn - 4) awmin tun dinhmunah DCHC ah khum indaihlohna a awmloh thu a report. Tun dinhmunah DCHC-a Covid-19 vei enkawl te zingah oxygen mamawh mi paruk an awm thu a sawi bawk. ZMC a enkawl mek mi pathum an awm thu a report bawk.