No.1605/2021-2022

Aizawl, the 29th July 2021: Vawiin chawhma khan Governor Dr Haribabu Kambhampati, Chief Rector, Mizoram University ni bawk chuan Raj Bhavan-ah  Prof JK Patnaik Pro Vice Chancellor and Prof Lalnundanga, Registrar, MZU te a kawm.

MZU hotute chuan Governor Kambhampati chu Mizoram University din a nih dan te, hmasawnna leh hlawhtlinna bakah hmachhawp awm mek te an sawipui a. Hun reilote chhungin Mizoram University chu India ram chhunga University hriat hlawh ber zinga mi a nih thu te, tunah hian chhim lam bial tan Southern Campus, MZU dinna tur ram zau tak Mizoram sawrkarin a pek tawh thu te pawh an sawi a ni. Governor Kambhampati chuan eizawnna atan talk, thiamna tangkai tak tak zirna lam hawi zawng a - Professional Course hrang hrang, Skill Development lam te bakah Hotel & Hospitality Management lamah te MZU chu tan la sauh sauh turin a chah a. Hmarchhak thalaite chu an taima hle nia a hriatthu te, India ram hmun hrang hrangah Hotel Lian pui puiah te, Company lian tak takah te pawh Hmarchhak thalai tam tak an thawh thu leh an taimak avanga a chhawrtute pawhin an duh thu a sawi a. Company te chuan mi taima leh leh hnathiam an duh a; Mizoramah pawh chutiang mi kan chher chhuah chuan kan awmna hmun hlat lam ngaihtuah lovin Company tam takin Campus Interview rawn neih inchuhin kan thalaite an rawn thlem zawk dawn a ni a ti.

Mizoram sawrkar leh MZU thawhhona zarah Lunglei mipui ten ram zau tak Southern Campus dinna atana an pe chu fakawm a tih thu a sawi a. University ram te chu phal taka pek a nih angin a petuten ramri hung a ngaih hunah pawh  tha taka MZU an thawhpui a beisei tih a sawi a. Southern Campus, MZU a puitlin thuai theih nan Central Sawrkar pawh a dawr dawn tih a sawi bawk a ni.