No.1677/2021-2022
Aizawl, the 3rd August 2021: Nimin chawhnu khan Governor Dr Haribabu Kambhampati chuan Union Home Minister Amit Shah chu Parliament House, New Delhi-ah a kawm.

Governor Dr Haribabu Kambhampati chuan Union Home Minister Amit Shah hnenah hian tunlaia Mizoram dinhmun, ramri buaina chungchang leh Mizoram tan a thil pawimawh tak tak te a thlen a. Governor thil thlennte hi Union Home Amit Shah chuan ngun takin a lo ngaithla a. Ramri buaina chungchangah pawh inremna a awm thuai theih nan thil tih ngai apiang te tih a ni a, uluk takin hma lak mek a ni tih a sawi a ni.

Union Home Minister in Mizoram mamawh te tha taka a lo ngaihthlak avanga lawmawm a tih thu Governor Haribabu chuan a sawi a. Boruak tha tak hnuaiah ramria buaina te chinfel a nih theih nan Governor chuan state pahniha mipuite pawh harsatna siam lo turin a ngen a. Remna lam hawi zawnga rilru put hmang siam a, hmalak tlan a pawimawh tih sawiin boruak ti chhe zawnga hma la lo tur leh thuchhuah te siam lo turin mitinte a ngen bawk a ni.