No.1678/2021-2022

Kolasib dated 3rd August 2021: Vawiin khan Dr. R.Lalthangliana, Health and Family Welfare Minister chuan District Hospital, Kolasib sak that dan tur a hmunah enin Kolasib District Level Task Force-te thutkhawmna hun a neihpui a. Vairengte tlawh nghalin Health Department hnuaia thawktute leh khawtlang hruaitute nen inkawmna hun an hmang nghal bawk a ni.

Circuit House, Kolasiba DLTF-te a kawmnaah hian Health Minister Dr.R.Lalthangliana chuan Kolasib district chu Mizoram hmel lanna district pawimawh tak a nih angin Kolasib district chhunga Sawrkara mawhphurna chelhtute leh tlawmngai pawl hrang hrangte an pawimawh zia a sawi a, hrileng dona kawnga an thawhhlawk zia tarlangin an inpekna hrang hrangah lawmthu a sawi bawk a ni. Kolasib District DCHC chu changtlung zawka thawmthat tum a nih thu leh District hospital tan 80 LPM, NESIDS atangin leh 250 LPM, PM Cares atangin Oxygen Plant khawl bun turin hma chak tak a lak tum a nih thu a sawi bawk a ni. Aizawl khawpuia hrikai hmuh belh zel dan enin Total Lockdown kalpui chhunzawm tul a ngaih a nih thu tarlangin hemi chhung hian a tul dan a zirin Mass Testing pawh kalpui a nih thu a sawi bawk a ni. Ramri buaina avanga Assam lam a kawng dan vangin dam lo enkawlna tur damdawi pawimawh tak tak a tangkhang tel chu pawi a tih thu a sawi a hemi chungchangah hian Union Home Minister Amit Shah leh Assam Health Minister Keshab Mahanta hnenah lehkha a ziah thu a sawi bawk a ni.

Vairengtea khawtlang hruaitute a kawmnaah hian Covid-19 hri dona kawnga an harsatna hrang hrangte ngaihthlak sakin a tul apianga hman atan cheng singkhat a hlan a, HOPE Centre, Vairengtea Covid-19 hrikaite enkawl nan cheng sangnga a pe bawk a ni. Ramria duty Mizoram Police-te hriselna endik turin Medical Operation Team-te chu ni 4 August 2021 hian an kalchhuah tur thu a sawi a," Ramri hrul a duty Mizoram Police-te leh khawtlang hruaitu, duty-te tawiawm a che chhuakte chu hri kai an inringhleh a nih chuan a thlawn a endik sak an ni ang," a ti. Ramria buaina thleng avanga state pawn atanga thutharlakhawmtu engemaw zah lo kalte chu thu dik hai lanna kawng a hmanraw tangkai tak a hmang thiam turin Health Minister chuan khawtlang hruaitute a chah a, Assam lam a kawng dan a nih avanga dam lo enkawlna kawnga harsatna awmte leh Covid-19 hri dona kawnga Mizoram Sawrkar hmalakna chungchangah state pawn atanga lo kal thutharlakhawmtute chu inkawmna hun a neihpui nghal bawk a ni. Health Minister hian Vairengte a tlawh zawh hian Kanhmun Covid-19 Screening Point a tlawh lehnghal bawk a ni.

Health Minister hi Pu K.Lalrinliana, Food, Civil Supplies and Consumer Affairs Minister leh Kolasib bialtu MLA ni bawkin a tawiawm a, Dr.H.Lalthlangliana, DC, Dr.Lalhlimpuia, CMO leh District Hospital, Kolasiba hotute, Kolasib Town Jt. VLTF leh Sub Hqrs YMA, Kolasib district hruaitute -te he thutkhawmnaah hian an tel bawk a ni. Health and Family Welfare Department atangin Dr. H.Lalchungnunga, Director, DHS, Dr. T.Lalhmangaihi, Director, DHME, Dr.Lalremmawii, Joint Director, DHS leh hotu dangten an tawiawm bawk a ni. District Hospital Kolasib hi khum za lenna Hospital tur a thawmthat nan North East Special Infrastructure Development Scheme atangin Crore 22 ruahman a ni a, hna tan tur hian a tul anga hmalak thuai tum a ni.