Mizoram Governor Lt Gen (Rtd) M.M Lakhera, PVSM, AVSM,VSM hovin vawiin khan Kohhran hruaitute leh Tlawmngai pawl hrang hrang hruaitute Raj Bhavan Durbar Hall-ah an in kawm a, Mizoram hmasawnna tura thil pawimawh hrang hrang an sawi ho.

He inkawmna ah hian zawhna hrang hrang chhangin Governor chuan Right to Education chungchang sawiin sum indaih lohna avangin anih tur angin hma a la lak theih loh thu a sawi a. Zirna kawngah thawktute chuan mahni tanghma hai mai lova midangte tana malsawmna ni tura inpekna nen thawh a ngai a ni a ti. NIT chungchang sawiin bultanna tak tak anih avangin changtlung taka tih nghal mai theih a ni lova, chu chu hriatthiam a tul thu sawiin hetih rual hian inzirtirna lam leh heta tana pawimawh thil te chu ngaih pawimawh hmasak phawt a tul a ti a. Building sak turah sorkar laipui thu a ni a ti bawk.

Assam ram nena ramri chungchang sawiin state pahnih ten in thuruala rilru hawnga siamfel duhna neih a ngai a ni a ti. Myanmar leh Bangladesh atanga foreigner lo lut mikhual chungchang ah Governor chuan ram mi ten an chunga that chhuah chu thil mawi tak anih rualin khawtual mite zawkin harsatna an tawh phah hialna tur erawh chuan kan khawsak pui tur a ni lo, a ti.

Mizo Divorce Act chungchang tun thlenga tih puitlin loh chungchang pawh sawichhuah a ni a, Governor chuan lo enzui a tum thu a sawi.

Governor chuan MHIP leh Central YMA ten ruihhlo dona kawnga hma an lakna te fakawm a tih thu sawiin, thawk leh khatah tih reh duak theih a ni lova, thunun hmasaka ti remtura beihzui leh a ngai a ni a ti.

Governor chuan Mizote chu hnathawk mi, taima tak an ni a ti a, amaherawh chu hnathawhna kawng hrang hrangah kaihhruaina leh remhriatna tha kawhhmuhtu an ngai a ni a ti bawk.