Raj Bhawan sak thatna tur lung phum chu vawiin khan Larsap Lt. Gen. (Rtd) M M Lakhera PVSM, AVSM, VSM leh Chief Minister Pu Lal Thanhawla ten Raj Bhawan Annexe bulah an phum a. Lung phum zawh hian Raj Bhawan Durbar Hall-ah inkhawm tawite neih nghal a ni.

Larsap chuan 13th Finance Commission in Raj Bhawan sak thatna tur sum a ruahman chu lawmawm tiin vawiin a, a sakna tur lung phum ni ta chu ni chhinchhiah tlak a nih thu a sawi. Raj Bhawan sak that hna chu hna hautak leh hna harsa a nih a rin thu sawiin Larsap chuan PWD ten chona a ngaia tha taka an sak a beisei thu a sawi. Raj Bhawan sak thatna tur ruahmanna ah hian tuna thing dinglai te kih an nih loh tur thu a sawi bakah solar water heating system te hman a ni dawn a ti.

Chief Minister Pu Lal Thanhawla chuan Raj Bhawan chu Mizoram leh Mizo mipui te tan rotlin a nih thu sawiin a sak thatna tura Sap hoin kum 1899 bawr velah building an sakte chu thiat lovin, a thar nen in chawih a sak a nih tur  chu lawmawm a ti.  Raj Bhawan sak thatna tura ruahhmanna a INTACH Mizoram Chapter te rawtna Larsap in a ngai pawimawh chu  fakawm a ti. Chief Minister chuan Raj Bhawan sak thatna enpuitu ‘Monitoring & Evalution Committee for reconstruction of Raj Bhawan’  Chief Secretary kaihruaina hnuaia din anih thu sawiin he Committee hian uluk leh fimkhur taka a sakna bungrua te chu enzui turin a chah a ni.

Vawiin lung phumna inkhawm ah hian Pu Lalkhama, Vice Chairman, State Planning Board, Pu Vanhela Pachuau, Chief Secretary bakah official dangte an tel bawk a ni.

Technical Report petu Pu R Vanlaltluanga, CE(Building) PWD chuan Raj Bhawan luahlai  mek building chu kum 1899, British hun laia sak a nih tawh thu leh a hlui tawh avanga siam that(repair) chi a nih tawh loh avanga a thar a sak tura duan a nih tak thu a sawi a. He building British kutchhuak ding kan la neih tlemte zinga mi hi Mizorama thilhlui, hlutna sang tak nei a nih avang erawh chuan a lung bang hi thiat lova a thar nena inhne rem tura zuah a ni dawn a, building thar pawh hi a hmun ngaia sak tura ruahhman a ni, a ti bawk. Building thar hi RCC framed structure a sak a ni dawn a, half brick walling te, teak kawngkhar leh tukverh te, Mangalore tile roofing te, Gypsum board te, veneer/marine ply te hman a ni dawn a. Governor’s chenna bik leh VVIP rooms ah te chuan Italian marble leh laminated wooden flooring te hman a ni ang. Building area leh floor area te chu square metre 3008.00 leh square metre 6150.00 a zau a sak tura ruahman a ni.

Raj Bhawan sak thatna tur senso atan 13th Finance Commission in cheng vaibelchhe 30.00 a ruahman a ni. Raj Bhawan sak thatna tur architectural drawing chu ‘AVESANA’ Vasant Kunj New Delhi a mi te siam a ni.

Building thar hi a cheng mekte ti buai lova thla sawmthum pahnih chhunga  sak zawh tum niin hna hi thawh li (4 Phase) a zawh tur a duan a ni. Building thar sak nan hian tender koh a ni tawh a, a chhangtu te technical bid enfel mek a nih thu CE chuan a sawi bawk a ni.