Vawiin khan Governor Lt. Gen. Nirbhay Sharma, PVSM, UYSM, AVSM,VSM (Rtd.) President Mizoram Rajya Sainik Board (MRSB) kaihhruaina hnuaiah Raj Bhawan Darbar hall-ah sipai bangte leh an chhungte chhawmdawl leh hamthatna an nei theih nana din Mizoram Rajya Sainik Board meeting pawimawh tak neih a ni a. Meeting ah hian Chief Minister Pu Lal Thanhawla; Lok Sabha MP Pu C.L. Ruala; Parliamentary Secretary Lt. Col. (Retd.) Z.S. Zuala; Parliamentary Secretary Pu Hmingdailova Khiangte bakah Mizoram Sawrkar hotulu – Chief Secretary, DGP leh Ministry of Defence aiawhte leh Sipai hotulu thenkhat an tel  a a ni.

Governor Lt. Gen. Nirbhay Sharma chuan Mizoram sipai bangte chu kawng tinrengah sawrkar leh khawtlang tan mi thawh hlawk, entawntlak leh tangkai an nih thu sawiin ramchhung hmun dang ngaihtuahin hei hi an danglamna bik riau a ni, a ti. Mizoram Chief Minister 5 zinga pathum te chu military background  nei an an nih thu sawiin sipai bangte hi politics ah sulhnu tha tak tak nei an awm, sawrkar flagship programme ah te hmahruaitu niin state hmasawnna atan theihtawp chhuahin tan an la mek a ni, a ti. 1960 leh 1970 bawr vela Mizo sipai tang leh tuna tang mek ngaihtuahin an tlem a, abik takin officer level ah phei chuan a inthlau hle a mahse hei inhtlauhna hi Sainik School, Chhingchhip a kan neih takah chuan a kiam ka ring a ni, a ti a. Sainik School Chhingchhip ah hmeichhe te an luh ve theih nan tan lak mek a nih thu sawiin thalai tam thei ang ber ten Armed Forces an zawm theih nan Rajya Sainik Board in tun aia tan lak nasat a tul tih a sawi bawk.

Rajya Sainik Board meeting chu tun aia zinga neih a tul tih sawiin hei hi ti hlawhtling turin a mawhphurtu state leh central sawrkara thawk ten tan la se a ti a. District hrang hranga awm sipai bangte hamthatna turin District tinah Sainik Office hawn chu tha a tih thusawiin kawng hrang hrangah sawrkarin a hlawkpui dan tur te sawiin Ministry of Defence aiawh te chu he thilah hian tan laksak turin ngen a ni a. Sipai bangte hamthatna chungchang zau taka sawi turin meeting a tel te chu a sawm a ni.

Chief Minister Pu Lal Thanhawla chuan sipai bangte enkawl leh hamthatna hrang hrang pek leh siamsak te chu state leh central sawrkar mawhphurna a nih ve ve thu sawiin hemi kawngah hian Mizoram sawrkar chuan a theih ang angin tan la in, theihtawp chhuahin kan chhawmdawl zel a, civil mi ngaihtuahin sipai tam zawk hi kum naupang te ah pension-in an chhuak a, hna dang an thawh leh theih nan te, re-employment leh self employment te hi an tan kan ngaipawimawh a, theih ang angin hemi kawngah hian hma kan la a ni, a ti. Ramngaw humhalh paha sipai bangte chhawr theihna turin Infantry Battalion hnuaiah Ecological Task Force din chu a vei leh tha a tih thusawiin hemi chungchangah a tul anga hmalak sak turin he thu hi ziakin Prime Minister hnenah a thlen tih a sawi a. Larsap-in ramngaw humhalh leh a chereu tur venna a vei leh a ngaihtuah chu lawmawm tiin Save Chite Campaign-a a hmalakna te lawmthu a hrilh a ni. 

Pu Lal Thanhawla chuan rambuai hmain Mizo te sipai a tang an tam thu sawiin Metei unaute aiawh pawhin Mizo officer an tam thin a, Imphal a Sainik School a awm hnuin Meitei sipai officer hi nasa takin an pung chho, Sainik School Chhingchhip hian hun lokal zel turah hemi kawngah hian nasa takin an thawhhlawk ka ring a, Sainik School hi sipaia tang tur chauh tan a ni lo a, khua leh tui tha, rinawm leh tangkai chherchhuahna hmanraw pawimawh tak a ni, a ti. Sainik School Chhingchhip ah hmeichhia te an luh theih na turin Mizoram sawrkarin tan a la mek tih sawiin Hostel Building Block pakhat chu hmeichhia te tan dah a ni a, Sawrkar Laipui ah pawh hemi chungchang hi kan thlen tawh a ni, a ti.

Thusawitu dang, Pu Prabhu Dayal Meena, Secretary, Department of Ex-Servicemen Welfare, Ministry of Defence chuan Ministry of Defence leh sipai bang te chhawmdawl nana din Kendriya Sainik Board, Directorate General of Resettlement leh Ex-servicemen Contributory Health Scheme (ECHS) hnuaia hmalakna leh ruahmanna thar siam engemawzat chungchang a sawiin One Rank One Pension-a kalpui mek dante leh 7^th Pay Commission hnuaia sipai bang leh pension, abik takin Disability Pension-a hamthatna an dawn tur te pawh a sawi lang a ni. Mizoram Sawrkar hnuaia Directorate of Sainik Welfare & Resettlement, Director thar, Maj. Zosangliana Hualngo chuan sipai bangte chawmdawl nana Mizoram sawrkar hma lakna te a sawi bawk a ni.

Mizoram Rajya Sainik Board meeting hnuhnung ber hi March ni 1, 2012 khan neih a ni a. Vawiina meeting ah hian meeting hmasa a thu rel te bawhzuina leh tihlawhtlin a nih te thlir ho a ni a. Hma lak dan chungchang te zau taka sawi ho a ni a, ECHS a harsatna tawh mek sutkian dante, Sainik Office la nei lo District-a Office hawn belh chungchang te, Eco Task Force din a nih theih nana hma lak tur dan chungchangte pawh sawi lan a ni.

Indopui II a tel te (World War II Veteran), gratuity pek mek chu December 2012 atang khan tih san niin thlatin cheng 1000 atangin cehng 1200 a tih san a ni a; an nupui te gratuity pek pawh cheng 800 atangin cheng 1000 a tihsan a ni a. May 2014 atang khan Gratuity hi 2^ndAssam Regiment a tang thin (disbanded personnel) te tan pawh thla tin cheng 1200 a tihsan a ni a. 2 March 2012 atangin 4 July 2017 thleng khan World War Veteran II leh Widow 1025 lai hi cheng nuai 529 chuang pek an ni tawh a. ECHS Poly Clinic  hi Aizawl ah 2003 khan din niin Lunglei ah 2016 a din a ni a, sipai bang leh an chhungte mi 4613 vel inziak lut an awm mek a ni.