3763/2022-2023

Aizawl, the 6th March 2023: Vawiin chawhma khan Governor Hari Babu Kambhampati chuan Virender Jokhar, Executive Director, NHIDCL leh a thawhpuite a kawm a. He hunah hian Mizoram hmun hrang hranga NHIDCL in project hrang hrang - kawngpui siam hna leh hna dang a thawh mek te thlirho a ni a. NHIDCL hotute chuan an hmasawnna bakah harsatna an neih mek hmanhmawh zawka a chinfel ngai te Governor hnenah hian an thlen a ni.

Governor Hari Babu Kambhampati chuan Aizawl to Vairengte kawngpui 4-lane a zauh tur, la thawh theih rih loh mahse National Highway 2-lane a siam mek te 60% lai thawh zawh a ni ta chu lawmawm a tih thu a sawi a. NHIDCL te chuan an hnathawhnaah harsatna an neih te chu chinfel zung zung dan an dap thiam a ngai a, kum 2024 March thla a lo thlen chuan 2-lane NH kawngpui te hi hman theih tura Siam zawh hman a ngai a ni a ti. Mizoram tan kawngpui tha leh Rel kawng te hi a pawimawh tak zet a, heng hmasawnna ruhrel liantham leh pawimawh tak te hi siam zawh a nih hun chuan Mizoram economy hmelhmang nasa takin a danglam dawn tih a sawi bawk.

Mizorama National Highway awm mekah hian NHIDCL hian enkawl/siam tur a nei thui ber a. Tunah hian National Highway siam tur an neih KM 888 a thuiah hian KM 248 an siam zo tawh a, KM 560 siam la hmabakin KM 80 a thui pawh siam belh an tum mek bawk a ni.

NHIDCL official ten report an pek dan chuan JICA sum hmangin NE Road Network Connectivity improvement project Phase -1: Aizawl to Tuipang, Phase -2: 4 numbers of Bypasses on Aizawl to Tuipang leh MoRT&H sum hmangin Bharatmala Pariyojana hnuaiah Seling -Champhai, Lunglei -Tlabung, Tuivai -Keifang leh Vairengte - Sairang siam hna thawh mek a ni a. Heng project hnuaiah hian kawngpui 2-lane 732.10 Km a thui chu Rs Rs 14944.94 crores sengin siam mek a ni. NHIDCL chuan 4-lane road : Aizawl - Vairengte leh 2-lane road  : Keifang -Tuivai road package -II te pawh an la thawk leh dawn e. Hemi hna thawhna tur China kawngpui thui zawng chu 103.11 km niin a siamna atan Rs 1389 Crores ruahman a ni.