3762/2022-2023

Champhai, the 6th March, 2023: District Administration, Champhai District hmalakna kaltlangin District Hospital Champhaia hman tur ICU khum 10 leh a kentel hmanraw mamawh hrang hrang, cheng nuai 40 man hu chu vawiin chawhma dar 10:00 khan Mission ICU chuan District Hospital Champhai kutah a hlan. He hun Nursing School Building-a hman hi Health & Family Welfare Board Vice Chairman, Dr. ZR Thiamsanga, Champhai North bialtu MLA chuan khuallian niin a hmanpui a ni.

Khuallian Health & Family Welfare Board Vice Chairman Dr. ZR Thiamsanga chuan Mission ICU te atanga ICU khum leh hmanrua engemawzah inhlanna hun neih a ni chu Champhai District tana ni chhinchhiah tlak tak a nih thu a sawi a. Mission ICU in ramri dep leh lamhla tak, Indo-Myanmar border-a awm Chanmphai District-ah hma an rawn la chu lawmawm a tih thu a sawi a, a hlawhtlin theih nana District Administration leh Official dangte hmalakna fakawm a tih thu a sawi a. An hnathawh avangin Mission ICU chu Champhai mai nilo Mizoramin a hriat reng tawh tur thu a sawi bawk.

H&FW Board Vice Chairman chuan District Hospital leh District hmun danga Health Department thawktute inpekna fakawm a tih thu sawiin, hmanraw changtlung zawk neih belh chuan hmasawnna leh phurna a thlen ngei a beisei thu a sawi a. District Hospital Champhaiah cheng vaibelchhe 14.5 sengin Critical Care Block siam tum a nih thu leh sum pawh ruahman fel a nih thu a sawi a. Nursing School Hostel sak mek a nih thu pawh sawiin, a ranglama Nursing School kalpui a nih theih nan Sawrkarin hma a lak zel thu a sawi a. District Hospital Champhaiah ICU leh Dialysis-te pawh thawktu indaihlohna karah kalpui mek zel a ni tiin, Trauma Centre puitlin theih nana theihtawp chhuahho a pawimawh thu a sawi bawk.

District Bawrhsap Pu James Lalrinchhana chuan kalkhawmte lawmna thu a sawi a. Planning Secretary finchhuahna kaltlanga May 2022 a hmalaknate a taka puitlin a ni chu lawmawm a tih thu a sawi a. Champhai District-in hriselna kawnga hmasawnna ruhrel pawimawh tak a nei chu bung thar kaina a nih thu sawiin, Mission ICU te thahnemngainaah lawmthu a sawi bawk.

Dr. Edmond Fernandes, Founder & CEO, CHD Group, Co-founder, Mission ICU chuan Champhaiin an team-te tha taka an lo dawnsawnnaah leh thawhhona duhawm tak avangin lawmthu a sawi a. North East State-a hmalakna an pawlin an ngaih pawimawh thu sawiin, India rama thingtlang khua 20 an thlan zinga 9 te North East State amite an nih thu a sawi a. Vawiina Champhaia ICU khum 10 hlan nen hian India rama thingtlang khaw hrang hrang 20 ahte ICU khum avaiin 200 an hlan fel tak thu a sawi bawk.

Pu Maanoj Shah, Mission ICU Co-Founder hnen atangin kum hnih kalta chhunga Mission ICU hmalakna langsar zualte ngaihthlak a ni a. Covid-19 hrileng avanga health facility tha dawng thei lo, nunna tam tak chan an awm leh harsatna awmte hre reng chunga hma la an nih thu a sawi a. ICU khum 200 na an tlin theihna Champhai an hriatreng dawn thu a sawi a. Khawpui leh thingtlanga health facility inthlauhna tizim tura tan an lak zel dawn thu a sawi bawk.

Dr. Zatluanga, DMS, District Hospital Champhai hnen atangin Hospital report ngaihthlak a ni a. Mission ICU Core a hmang a. Mission ICU supporting partner-te atangin Pu Sidharth Dua, Senior Manager, SAMRIDH, IPE Global leh Pi Anwisha Thakur, Consultant-CSR, Kantar India Foundation ten thu an sawi bawk a. NGO aiawhin Pu F.Larinmuana, Sub-Hqrs YMA President-in khawtlang aiawhin lawmthu a sawi bawk a. Pi C.Ramdinmawii, Asst Director (F&D), Champhaiin lawmthu sawiin hun hman a khar a ni.

Mission ICU kaltlanga hmanraw hlante hi ICU khum 10 bakah Ventilator (2 units), Bipap (2 units), Monitor (5 para), 2-function ICU cots (10 units), Syringe pump (2 units) leh Infusion Pump (2 units) te a ni.

Hmanraw inhlanna hun hman zawh hnu hian District Administration, Champhai leh Edward & Cynthia Institute of Public Health, Mangaluru, Karnataka tangkawp buatsaihin he huna lo tel mithiamten Health & Family Welfare Department leh Disaster Management hnuaia thawktute pual Workshop, 'Advanced Health Systems Strengthening & Operational Readiness in Humanitarian Emergencies' tih leh, Talkshow 'Scaling Impact in Rural areas & Needful intervention for healthcare' tih thupui hmangtein an buatsaih a, hun hlawkthlak tak hman a ni.