Vawiin khan Mizoram Rajya Sainik Board Meeting vawi 12-na chu an president Mizoram Governor hovin Raj Bhawan Conference Hall-ah neih a ni a. He Meeting-ah hian Board Vice-President Chief Minister Pu Lal Thanhawla leh Board Ex-Officio member Home Minister Pu R.Lalzirliana bakah memebr dang an tel kim hle.

 

 

Meeting thuhma sawiin Board President Mizoram Larsap chuan sipai bangte leh an chhung leh khat hamthatna tura hmalakna hrang hrang a tarlang a. Indopui II-na tuartu World War Veteran lweh war Widows mi 1360 lai te chu chhawmdawlna tangkafai cheng nuai 133 sem an ni, a ti a. Nikum Armed Forces day puala thawhlawm khawnah cheng 92,078 hmuh a nih thu leh Vijay Diwas/Ex-Servicemen Reunion Rally pawh neih a ni thu a sawilang a. Sipai bangte tan bik hriselna lama inenkawlna tur ram pum huap April 2003 atanga thlak pawh Mizoramah chak taka kalpui a nih thu sawiin he Scheme hnuaiah hian sipai bang leh an chhungkhat mi 1177 an inziak lut tawh thu Governor hian a tarlang bawk. Defence Minister’s Discretionary Fund atangin sipai bang leh hmeithai te chu cheng nuai 74.10 tanpui sem a ni tawh a. Sipai bang la valai tak tak mi 22 zet Mizoram 5th IR Battalion-ah lak an nih thu Larsap hian a sawilang bawk.

Vawiin meeting chuan thil chi hrang hrang engemawzat an rel a. Chung zingah chuan Gallantry Cash Award te, Indopui II-na kaihhnawih ho tanpuina sum dil belh te, sipa thihsan hmeithai leh sipai inhliam te tana ex-gratia tihpun rawtna te, Champhai leh Kolasib-a Sainik Office hawn chungchang te, Mizorama Sainik School din tur chungchang leh Mizoram sorkar hnuaia Territorial Army Battalion (home & hearth) din tur chungchang te a tel.

Ex-Servicemen hamthatna tur an sawiho bawhzui hian Board Vice-President Chief Minister Pu Lal Thanhawla chuan Kargil indona hamsa bera nunna chan ta Ex-Sepoy Rohmingliana farnu Zothansangi chu Police Department hnuaia Grade- IV hna pe turin a hriattir nghal a. Kum 2004-a inkahna atanga ramtui leilo Ex-Sepoy Zonunmawia unaupa Zoramsanga pawh Police Department-ah bawk Driver hna pe nghal turin Chief Minister hian a hriattir bawk.