3540/2023-2024

Aizawl, 29th January 2023: Vawiin khan Prime Minister Narendra Modi hovin Pariksha Pe Charcha vawi 7-na chu Bharat Madapam, ITPO, New Delhi-ah neih a ni a. He program liantham takah hian zirlai, nu leh pa, leh zirtirtu vaibelchhe hnih vel an tel a chhut a ni a. Government Mizo High School Multipurpose Hall, Aizawl-ah Video Conference kaltlangin Mizorama zirlaite, nu leh pate, zirtirtute leh School Education official te pawhin he hun hi an chhim a. School Education Department huaihawt, Pariksha Pe Charcha program - Mizoram hi Governor Dr Hari Babu Kambhampati leh Lady Governor Jayashree Kambhampati te chuan an hman pui a ni.

Prime Minister Narendra Modi thusawi thlirhona neih a nih hma hian official function tawi buatsaih a ni a. Hu hun hi Dr Lalzirmawia Chhangte, Secretary, School Education chuan inlawmna thusawi hmasain tan a ni a; hemi hnu hian Governor Dr Hari Babu Kambhampati chuan Pariksha Pe Charcha puala thuchah a sawi chhunzawm a ni.

Governor chuan Pariksha Pe Charcha program chu zirlai tam takin Exam an huphurh avanga rilru lama harsatna an neih thin tih ziawm a nih theih nana Prime Minister hmalakna pawimawh tak a ni tih a sawi. Prime Minister chuan zirlai tam takin Exam hmachhawn huphurhna avanga harsatna an tawk a vei thu leh a mah ngei pawhin zirlaite kawng kawhhmuhna atan lehkhabu “ Exam Warriors” tih a ziah thu a sawi bawk.

Governor chuan Zirlaite chu ram nghahfak te an nih avangin ram tan an hlu tih a sawi a. An rilru hriselna lam hi kan ngaihpawimawh tlan a ngai a ti. Exam a ni emaw harsatna engpawh huaisen tak leh huphurhna nei lova hmachhawn a nih phawt chuan harstna pal ngamtu chuan a hnuah hlawhtlinna lian zawk a hlawh chhuak thin tih a sawi. Zirlate tan Exam hi a tawpna a ni a, mark hmuh tlem pawh hlawhchhamna tehna a ni lova, mark hmuhtam pawh hlawhtlinna tehna a ni hek lova. Rilru chak leh chaklo te hian hlawhtlin theihna an neih dan a intiat vek a, an hlawhtlinna tur kawng erawh a danglam mai a ni a ti. Exam chungchanga zirlaite harsatna awm thei te zirlai leh nu leh pate an ngaihven thuai a, an tanpui a pawimawh tih a sawi bawk a ni.

Governor Dr Hari Babu Kambhampati thusawi : dipr.mizoram.gov.in/post/governor-dr-hari-babu-kambhampati-leads-the-participation-of-mizoram-at-the-live-screening-of-prime-ministers-address-on-pariksha-pe-charcha

Governor thusawi zawhah hian Prime Minister Narendra Modi thusawi ngaihthlak chhunzawm a ni.