Central Hindi Directorate, Government of India bultuma buatsaih 40^th Rashtriya Nagari Lipi Sammelan (National Civic Script Conference) chu vawiin chawhma khan Mizoram Governor Lt. Gen (Retd.) Nirbhay Sharma PVSM, UYSM, AVSM, VSM chuan Mizoram Hindi Training College, Durtlangah a hawng a. He Conference ni hnih awh tur ah hian Department of Official Language, Government of India aiawhte, Council of Nagari Lipi member-te, hla phauh thiam leh ziakmite India ram hmun hrang hrang atangin an tel a ni. 

Khuallian Lt. Gen. Nirbhay Sharma chuan hnam hrang hrangte tawng chuan an khawsak phungah dinhmun pawimawh tak a awh thu sawiin, mihringte inlaichin nan leh hnam nunzia inhriathiam tawn nan a pawimawh a ti a. Mizoramah sawkar laipui chuan Hindi chawikan tum thin mahse, hma a la sawn thei tak tak rih lo a ti. Mizoten Hindi tun aia chak zawka an thiam theih nan chuan tihluihna tel lovin sikulah pawl hniam ber atanga in zirtir nise a ti a. Electronic media leh film te hmanga in zirtir a duh thu a sawi a ni. Governor chuan hnam hrang hrangte hian entawn tlak nunzia an neih thu sawiin, chung chin dan tha hnamdang tawnga inziak te chu Mizo leh Hindi tawnga leh tawn a rawt a ni. Hindi chu Mizo tawng tibo tur nilo in, India rama hnam hrang hrangte inpumkhat nan tha a tih thu a sawi bawk. 

Khualzahawm Pu R. Lalrosanga, Director of H&TE, Mizoram chuan Mizoram Hindi Training College din a nih chhoh dan te a tarlang a. MHTC chu Mizoram University nena thlunzawm an duh thu sawiin, University Grants Commission (UGC) kaltlangin tanpuina an dawng thei dawn a ni. 

He Conference hawnna inkhawm hi Principal Dr. Louis Hauhnar chuan a kaihruai a. Council of Nagari Lipi President Dr. Parmanand Panchal, General Secretary Dr. Hari Singh Pal leh Scientific & Technical Terminology Chairman Prof. Avnit Kumar te’n thu an sawi bawk a ni. 

Council of Nagari Lipi chuan Nagari Award semna an nei a. Mizo zingah Pu Robert Romawia Royte, Dr. Louis Hauhnar, Dr. V.R. Ralte leh Dr. Lalengzami te chu hlan an ni a. Tlaiah Nagari Lipi Parishad huaihawtin ‘Poets Meet’ Raj Bhavan-ah neih a ni bawk ang.