Vawiin chawhma khan Mizoram Governor Lt. Gen. (Retd.) Nirbhay Sharma PVSM, UYSM, AVSM, VSM chuan a thawhthumna atan Aizawl khawpui a fang chhunzawm leh a, Mizoram Synod Office, Synod Higher Secondary School,  Seventh Day Adventist Hospital leh Gan Sabra te a tlawh a ni.

Mizoram Synod Office-ah hian Moderator Rev. Lalzuithanga kaihhruaiin inkhawmna neih a ni a. Governor chuan sipaia a tan chhungin Mizoram tih loh India ramria state-ah te a awm tawh thu a sawi a. Mizoram chu heng ramria awm state-te zinga hmasawn chak ber pawl a nih thu sawiin, kohhran, tlawmngaipawl leh mipuite vang a nih thu a sawi. Faina, ziak leh chhiar thiam leh thil hrang hrangah changkang tawh hle mah ila, engvang in nge India ramah a berte zingah kan tel loh kan in zawh a ngai a ni, a ti a. Sawrkarin a tih tur ti mahse mipui pawhin mawhphurhna kan nei ve a, intodelh kawngah kohhran chuan mipui a zirtir thei a ni, a ti. Khawvel inher danglam zelah rilru zau tak pu chunga thlirna thui tak kan neih a ngai a ti a, keimahni chauh in en lovin midangte chi dan tha entawn in, Mizo leh saptawng bakah Hindi pawh hnamdangte nena kan inlaichin nan thiam tha a tih thu a sawi. Hriselna chungchang sawiin, sawrkar hmalakna Mizoram against Drugs and Tobacco (MADAT) leh Healthy Mizoram te chu thlawp turin a sawm a. Sr. Executive Secretary Rev. Lalramliana Pachuau chuan Mizoram Synod hnuaia Committee awm te, an kalphung leh hmalakna thenkhatte a tarlang a ni.

Governor chuan Mission Vengthlanga Synod Higher Secondary School chu tlawh lehin zirlai naupangte chu an tumah chiang turin a chah a, an tuma an chiang chuan thil engmahin a dang loh tur thu a sawi a. Hlawhchham chang an neih tur thu leh tihsual neih a pawi loh thu sawiin, vawiina an awm dan leh zirchhuah te chuan an hmalam hun tur thui tak a hril thu a sawi a ni. Khawtlangah kan nu leh pa te chu kan entawn ber an nih rualin, kan chhungten ruihtheih thil emaw zuk leh hmuam an tih loh nan tih theih kan nei ve a ni, a ti bawk. Synod HSS Principal Lalvena Hnamte chuan he inkhawmna hi a kaihruai a ni.

Seventh Day Adventist Hospital-ah hian Medical Director Dr. Eileen Lalrinpuii leh a thawhpuite chuan lo dawngsawng in, hospital hmunhma an fankualpui a. Hospital-a thawktute inpekna chu ropui a tih thu sawiin, midang tana thil tha an tih chu Pathian rawngbawlna a ni, a ti a. An hnathawhte tluang taka an chhunzawm theih nan duhsakna a hlan a ni.

Governor Nirbhay Sharma chuan Zonuama Gan Sabra chu tlawh in, naupangte hnen ah thilpek hlan in, hun hlimawm tak an hmang bawk a ni.