Vawiin khan District Disaster Management Authority (DDMA) Mamit District buatsaihin Mamit khawpui chhung hmun 5-ah Lirnghing leh kangmei lo thlen thulha chetlak dan tur nunchan (Mega Mockdrill) neih a ni.

Mega Mockdrill hi khawpui chhung hmun hrang hrang DRDA Office, Dinthar veng, State Bank Of India, Mamit Branch, Venghlun, St. Francis of Assisi Primary School, Bazarveng, PHE Office, Field vengah leh Bazarveng, Bazar hmunah te neih niin DRDA office, St.Francis of Assisi Primary School-ah leh PHE Office-ah te Lirnghing lo thlen thulha chetlak dan tur entir niin SBI, Mamit Branch leh Bazar hmunah te kangmei chhuak laka chetlak dan tur entir a ni thung. Heng chhiatrupna thlenna hmuna mipui awmte chu chi-ai mai lova, mahni sahimna ngaihtuaha thuneitute thupek ngaichang tur leh Lirnghinna hmun chhuahsan dante entir a ni a, heng chhiatrupna a lo thlen thulhah hian rilru fim put pawimawhzia inzirtir niin chhanchhuah dan Demonstration SDRF te'n an nei bawk.

Vawiin chhiatrupna lo thlen thulha chhanchhuahna hna thawh dan tur nunchan zirnaah hian State Disaster Response Force Team (SDRF), 4th IR Battalion te chuan chhanchhuahna hna an thawk a. Fire & Emergency Service, Mamit te'n kangmei thelhin District Hospital, Mamit te'n a hmunah hliam enkawlna hna an thawk a.Hei bakah hian khawtlang leh Department hrang hrangte chetlak dan tur entir a ni bawk.

Mega Mockdrill neih zawh hian DC Conference Hall-ah Mamit Bawrhsap Pi Lalbiaksangi hovin Debriefing neih a ni a. Hmasawn lehzelna tur leh duhkhawp loh laite sawiho leh a ni.