Vawiin khan MIFCO Chairman , Kolasib Bialtu MLA  ni bawk Pu PC Zoram Sangliana chuan MHIP Sub Hqrs , Kolasib Office ah a thlawna Computer zirna hmun a hawng.

Khuallian chuan tunlai khawvela Computer /IT thiam a pawimawhna sawiin Computer thiamlo chu hna chi hrang hrang ah chhawrna tur an tlem tiin kum bithliah awmloa Computer thiam chu Sawrkar hnathawk leh Private emaw Company a hnathawk tan pawh a ngai a ni a ti. Tunlai khawvel hmasawn zel ah IT hmanna a pung zel a, a hman  dan erawh fimkhur a ngai a, midang tana hnawksak lo leh pawisawi lo zawnga computer thiamna te hman tangkai a pawimawh thu a sawi a ni.Thalai leh mipuite tana a thlawna computer zirna hmun pawimawh tak Kolasib MHIP Sub Hqrs ten an buatsaih chu lawmawm tiin a tam thei ang berin eizawnna tlaka computer an zir chhuah theih nan duhsakna a hlan a ni.

Computer Training Centre hi MHIP Sub hqrs, Kolasib hmalakna hnuaia siam niin, trainers/zirtirtu a tan NIELIT a faculty member dah an ni a, Computer 21 (1 hi Trainer hman tur) awmin a duh apiangin a thlawnin Computer (Course on Computer Concepts, CCC) an zir thei dawn ani.  Zirtirna hi darkar 1 ah mi 20 in an dawng thei a, ni 1 ah mi 100 hnenah zirtirna pek thin an ni ang, tun dinhmunah seat hi a full vek tawh a, Batch thar a tana inziak lut pawh an thahnem tawh hle tih thu kan dawng a ni.