2181/2022-2023
Aizawl, the 4th October 2022: Governor Hari Babu Kambhampati chuan vawiin khan Autonomous District Council (ADC) 3 - LADC, MADC leh CADC hotute leh ADC hmalakna kaihhnawih department hotulu te leh Principal Accountant General te Raj Bhavan-ah a ko a. He hunah hian ADC ten Comptroller and Auditor General of India hnena an sum hmanna chipchiar(Account Statement) a hun taka an thehluh theih dan tur te leh ADC kaihnawih thil pawimawh dang te sawiho a ni.

Governor Hari Babu Kambhampati chuan meeting a kaihruai a. ADC hotute thusawi tura sawm hmasain an harsatna te a zawt a. District Council & Minority Affairs Department, Finance Department, Planning Department leh Principal Accountant General office lam ten ADC harsatna leh hmalakna kal mek te an sawifiah leh bawk a. Hemi hnu hian ADC 3 ten Account Statement thehluh chungchang, staff recruitment chungchang leh thil thenkhata ADC ten harsatna an tawh mek te sutkian dan tur te pawh sawiho a ni.

Governor Hari Babu Kambhampati chuan account statement buatsaih chungchangah ADC te chu tan la tur leh a hun taka CAG hnenah report thehlut thin turin a hriattir a. ADC in hmasawnna ruhrel siamna tur sum a nei tam tawk lo tih a hriatpui thu a sawi a. Hei vang hian ADC 3 hnuaiah hmasawnna ruhrel tam zawk thawh a nih theih nan zaa za Central sawrkarin senso a tum(100% financial support from the central government) tur project te nasa zawka dap turin ADC hotute hi a fuih a ni. Hemi kawngah hian nodal department – DC&MA ten nen thawhhona tha tak an neih a ngai a ni a ti.

Sum hman danah fimkhur a tul thu sawiin State Sawrkar hnuaiah chuan CAG in tanlakna tur leh endik ngai nia a ziah te bawhzui turin Public Account Committee a awm a. Hemi ang chiah hian ADC 3-ah te pawh mipui tana sum hmandan te endiktu committee pawimawh din ve tha a tih thu a sawi a ni. Governor chuan ADC 3 leh a kaihhnawih department hotulu ten dawhkan pakhat kila an hmalakna te thlirletna leh an harsatna te sutkian dan tur rela kumtin vawi 1 tal an thutkhawm ziah tha a tih thu a sawi bawk a ni.

State Sawrkar lam atanga secretary te sawi dan chuan ADC 3 tana budget ruahmanna chu 2nd Mizoram Finance Commission in rawtna a rawn siam hunah a hriat theih dawn a ni. ADC atanga rawtna hrang hrang thehluh tawh zinga mi CEM, EM leh MDC te hlawh tihpun chungchang chu Council of Minister te thutkhawm huna rel turin rawtna te siam a ni tawh a. Heng bakah hian ADC huam chhungah project proposal thenkhat thehluh mai tura buatsaih fel tawh chungchangte pawh sawi a ni.

Meeting-ah hian State sawrkar aiawhin Pu Vanlalchhuanga, Principal Secretary, Finance Department, Dr Lalrozama, Secretary, District Council & Minority Affairs leh Pu Lalmalsawma Pachuau, Secretary, Planning Department te an tel a. Pu L.Hangsing, Principal Accountant General leh a thawhpui te CAG office aiawhin an tel bawk a ni.

ADC lam atangin Pu V.Zirsanga, CEM,Lai Autonomous District Council(LADC), Pu Buddha Lila Chakma, Chakma Autonomous District Council(CADC) leh rawn tel thei ve lo, Pu Malvina, CEM, Mara Autonomous District Council(MADC) aiawhtu te an tel a. ADC 3 hnuaia senior officer te pawh an tel bawk a ni.