2182/2022-2023
Champhai, the 4th October, 2022: Champhai khawpui kianga luang Keilungliah lui khuah mek, peihfela hawn a nih hnua a enkawl zui zel kawnga hmalatu tura Sawrkarin a din, 'District Level Committee on Post Completion Management & Maintenance of Dam Reservoir cum Recreation Centre at Keilungliah' chu vawiin chawhnu dar 1 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Chairman Pu James Lalrinchhana, District Bawrhsap chuan Keilungliah tuikhuah chu Champhai tana rohlu leh ngaihhlutawm tak tur a nih thu sawiin, Champhai District leilung mawina mai bakah khualhip thei tura tangkai tak tur a nih thu a sawi a. Khualzin hipna mai piah lamah kawng hrang hranga hman tangkai theih a nih dan turte tarlangin, Sawrkar pawhin a enkawl zui zelna tur ngaipawimawhin District Level Committee mumal tak a siam a, District Committee mai nilo khawtlang nena tangruala enkawlho a pawimawh dawn thu a sawi a. Line Department hrang hrangte leh khawtlang inkarah thawhhona tha a awm phawt chuan hlawhtling taka enkawl chhunzawm a nih dawn thu a sawi bawk.

Executive Vice-Chairman Pu C.Lalhmachhuana, SE, PHED Champhai WATSAN Circle chuan Keilungliah tuikhuah dinhmun tlangpui a tarlang a. Hna za zela 98 zawhfel niin, a nih dan ang tur a nih deuh thuak tawh thu leh tui a luangliam tawh thu a sawi a. Service road, leimin venna kawng kam chei leh control room siam hna kalpui mek a ni, a ti bawk.

He hunah hian Member Secretary Pu ZD Dengthuama, EE, PHED Champhai WATSAN Division hnen atangin Line Department hrang hrang EF&CC, I&WRD, UD&PA, LAD, RD leh Fisheries Department kaltlanga hmalak theih dan turte ngaihthlak a ni bawk.

Thutkhawmah hian Line Department hotute hnen atangin hmalak theihna leh tul dangte ngaihthlak a ni a. Hmalakna tur chin hriatfiah a nih theih nan tuikhuah huam chin ramte leh an dinhmunte enfel nise tih niin, a tul angte tifel turin Revenue, PHE leh Forest Department-te hma la tura tih an ni a. Mipuite him zawk nan kalpawhna pawimawh 3 ah te gate siam nise, fimkhur tulna lai bik hmunahte a hungna siama daidan nise tih a ni bawk a. UD&PA Department atanga hmalakna tur fund beisei a nih chungchangte pawh sawiho niin, UD&PA leh PHED te chu hmalak tul angte lo zir lawk tur a tih an ni a, Committee leh huna thlirho leh nise tih a ni a. District Level Committee huapzau zawk leh nakin zel atana tangkai tur siam a nih theih nan a tul anga rawtna siama hmalak nise tih a ni bawk.