All India Radio, Aizawl-in kum 50 tlin lawmna an hman mekah Hindi programme an hman bikna ‘Hindi Fortnight’ kharna chu vawiin khan Mizoram Governor Lt.Gen.(Rtd) Nirbhay Sharma, PVSM, UYSM, AVSM, VSM-in a hmanpui a, AIR buatsaih Hindi magazine ‘Zo Orchid’ a tlangzarh nghal.

Khuallian Mizoram Larsap Lt.Gen.Nirbhay Sharma chuan hmarchhak biala radio station hmasa berte zinga mi, kum 1966-a din All India Radio Aizawl kum 50 a tlin lawmna hun pawimawh pakhat hmanpui tura sawm a nih avangin a lawm thu leh AIR Aizawl programme ngaihnawm tak tak a ngaihthlak thin thu a sawi a. AIR Aizawl ‘Golden Jubilee’ lawmna chi khatah ‘Hindi Fortnight’ an ruahman chu tha a tih takzet thu sawiin Pu Nirbhay Sharma chuan Mizote ziak leh chhiarah sang mahse tawng dang an thiam lohna hian an hmasawn tur angin hma a sawn tir lo zawk a. Mizo thalaite a kawmnaah Hindi tawng thiam an chak thu an hrilh thin leh hei hian Mizote zingah pawh tawng dang thiam chakna leh state pawnah inphochhuak a, eizawnna hrang hrang nei thei turin an inpeih tawh a ni tih a tarlang, a ti. AIR Station leh transmitter-te pawh tihchangtlun chho zel tum a nih chu a lawmawm a tih thu leh radio-a hindi programme hrang hrangah Mizo thalaite chawk phur thei zawnga siam thiam turin a chah a. AIR buatsaihin Hindi magazine tha tak ‘Zo Orchid’ tlangzarh a ni ta chu a lawmawm hle a, Mizote zingah Hindi tawnga thu (article) ziak thiam tam zawkte he magazine-a an thuziak thawh ve tura sawm turin a hrilh.

Khual zahawm Prof.C.E.Jeeni, President, Indian Institute of Indian Language & Literature pawhin thu sawiin ‘culture’ leh ‘language’ te chu a ruala kal zel tur an nih angin Hindi kan uar rual rualin tawng dangte leh Mizo tawng ngei pawh a thang zel ang a, hnam ziarang hrang hrangte pawh chhawm nun reng an ni ang, a ti. Tun hma khan Mizo zingah Hindi tawng duh lo leh do tlat an awm thin a, amaherawhchu hun kal zelah Hindi tawng pawimawhna, hlutna leh tangkaina miten an hre zel a, vawiinah chuan Mizoten mahni tawng piah lamah tawng dang thiam an duh tawh hi a vanneihthlak hle a ni, a ti bawk.

TOLIC Chairman & Vice-Chancellor MZU leh Khual zahawm ni bawk Prof.R.Lalthantluanga chuan AIR Aizawl ‘Hindi Fortnight’ chhunga Hindi tawnga inelna hrang hranga tithate hnenah lawmman a hlan a. AIR Aizawl Asst Director Pi Linda Zopuii Mukherjee chuan lawmthu sawiin hun a khar a ni.