Disaster Management & Rehabilitation Department buatsaihin vawiin khan naupang kum 10-14 inkar te tan State Level Painting Competition, Govt. J.L High School-ah buatsaih a ni a. He competition-ah hian naupang 100 vel an tel a ni. He intihsiakna a lawmman pakhatna atanga lawmman pathumna dawngtute hi November thla a Asian Ministerial Conference on Disaster Risk Reduction, New Delhi a neih tur behchhan a National Level Painting Competition buatsaih turah State aiawhin an tel dawn a ni.

Competition hawnna pual inkhawm tawi buatsaih ah Pi Zosangzuali, Deputy Director, Disaster Management & Rehabilitation Department chuan Mizorama chhiatrupna lo thleng tawh te leh Department hmalak tawh dante sawiin, chhiatrupna lo thlen thula mipui tawrhna a nep theih nan chetlak dan tur te leh naupangte mawhphurhnate inhrihhriatna hun a hmang bawk a ni.