Vawiin ah khan Governor Lt.Gen.(Rtd.) Nirbhay Sharma chuan Aizawl District chhunga Development Department hrang hrang te leh Vantlang tana thawk Department hrang hrang aiawh District Head of Department te chu Raj Bhavan ah ko khawm in an hmalakna, hmasawnna leh harsatna neih te a zawt a. He inkawmna ah Aizawl District Bawrhsap Dr.Franklin Laltinkhuma'n department hrang hrang aiawh in a lem hmang tangkai in Aizawl district chhunga sawrkar hmalakna te chipchiar takin a tar lang a ni.

Department hmalakna te chu Governor chuan chiang zawk a hriat a duh thu sawiin Aizawl Bawrhsap hnenah information chiangkuang tak thehluh a nih hnu ah lo zirchian a tum thu a sawi a. Sawrkar hmalakna hmun thenkhat te pawh hun remchang hmasa ah tlawh a tum thu a sawi. NLUP, Skill development, Medical, Education, Drug Addiction leh social security te hriat belh a duh thu meeting ah hian a sawi a ni. Department official te chu an figure leh data hrechiang turin a chah a ni. An harsatna leh mu tan lai te chiang kuang taka hriattir tura chah in a theihna zawnah Mizoram tana theihtawp a hmalak a inhuam thu a tarlang a ni.