Sawrkar Laipui hmalakna hnuaia thingtlang mite chawikanna leh tihhmasawnna tura hmalakna ruahmanna hrang hrang te kalpui dan viltu State Level Vigilance & Monitoring Committee chu vawiin chhun dar 12:00 khan Chairman Pu R.Lalzirliana, Rural Development Minister hovin Secretariat Conference Hall ah an thukhawm a, Pu Ronald Sapa Tlau, MP (Rajya Sabha), Minister Pu Zodintluanga, Minister Pu P.C.Lalthanliana, Parliamentary Secretary Col. Z.S.Zuala, MLA pathum - Pu Lalrinliana Sailo, Pu R.Vanlalvena leh Er Lalrinawma te bakah department kaihhnawih Secretary leh Director leh District tina Deputy Commissioner aiawh te an tel a ni.
Minister Pu R.Lalzirliana chuan sawrkar hnathawkte chuan hna an thawk tak tak ta ni-a a hriat thu sawiin thingtlang mite chawikan nana mawhphurtu te hmalakna ah lawmthu a sawi a, sawrkar sum tam tak senga thingtlang mite hmasawnna tura hmalakna hrang hrang te chuan rah tha a chhuah theih nan a hmunah mawhphurtu ten enfiaha vil ngun turin a chah bawk.
Pu Ronald Sapa Tlau chuan thingtlang mite chawikan nana thawktu leh mawhphurtute chu an thawh that leh that lohvin thingtlang mite a nghawng zel dawn a ni tih hre renga thahnemngai taka thawk chhunzawm zel turin a fuih bawk.
Vawiin meeting ah hian meeting kalta lama thurel bawhzui a nih dan te an thlirlet a, NREGS hnuaiah kum 2015-2016 chhungin Central leh State atangin sum Rs 1,39,04,61,000 /- hmuh a ni tawh a, District hrang hrangah inhlawhna ni 34 - 36 siamsak an ni. Thingtlang mi rethei in sakna (IAY) atan kum 2015-2016 chhung hian Rs 3,05,40,200 /- dawn a ni tawh a, Mizoram puma In 1293 sak tura ruahman ah In 391 sakna tur sanction a ni tawh bawk. Thingtlang khaw inkalpawhna kawng siamna PMGSY hnuaiah Mizoram ah khaw 246 tuam tura ruahman zingah khaw 167 chu kawng siam zawh a ni tawh a, kum 2001-a PMGSY thawh tan atangin Ministry of Rural Development chuan 2851.92 km thui khaw 217 kawng siamna atan Rs 97287.01 lakhs a sanction a, project 174 sanction tawh ah 2373 km kawng siam zawh tawh a ni. July 2015 thleng hian Formation Cutting 1728.97 km leh Black Topping 398.83 km siam zawh niin sum Rs 71310.97 lakhs sen a ni tawh bawk. SIRD, Kolasib hmalaknaa New SIRD Campus, Durtlanga Rs 1724.71 lakhs senga sak mek chu January 2016-a sak zawh tura beisei a nih thu te report a ni bawk. Heng bakah hian meeting ah hian National Rural Drinking Water Programme (NRDWP), Nirmal Bharat Abhiyan (NBA), National Social Assistance Programme (NSAP), Mizoram State Rural Livelihood Mission (MzSRLM), Integrated Watershed Management Programme (IWMP), DRDA leh Prime Minister Empoyment Generation Programme (PMEGP) hnuaia hmalakna te an thlir ho bawk a ni.
