Lead Bank Champhai buatsaihin vawiin chawhnu khan Pradhan Mantri MUDRA (Micro Units Development and Refinance Agency) Yojana (PMMY) kaltlanga Champhai District chhunga loan dilte hnenah sanction letter hlanna hun leh he scheme chungchang inhrilhfiahna hun Champhai I&PR Conference Hall-ah hman a ni a. He hun, Lead Bank Manager Pu SP Sharma kaihhruaiah hian Champhai District Addl. DC Pu C. Lalzarliana chu khuallian niin, Sorkar Office hotute, Champhai khawchhunga Bank hrang hrang Manager-te leh media lam bakah AMFU atang aiawh an tel a ni.

Addl. DC chuan Pradhan Mantri MUDRA Yojana chu small industries lama eizawnna kawng chi hrang hrang dap leh kalpui mekte tan awlsam zawka loan lak theihna remchang a nih thu tarlangin, he malsawmna hi Champhai District-ah a vawi khatna atan hman a ni tur chu lawmawm a tih thu a sawi a. Vawiina he scheme hnuaia loan la turte chuan an lak chhan hre reng chungin pawisa thawkchhuak theihna tur hnathawhna sum lu atan hmang turin a chah a. A rulh kawngah pawh rinawm a tul thu sawiin, anmahni mai bakah an hnunga he scheme hnuaia la dil duh turte tana kawng in hawn that leh thatloh chu tuna lo la hmasa ten an rulh that loh ah a innghat thui hle dawn a ni, Pu C. Lalzarliana chuan a ti a ni.

Vawiin hunah hian Pu Lalhminghluna, Branch Manager, SBI Champhai chuan sum lakluh a lo tam deuh anih chuan rulh hun tura tuk a ral hma pawhin sum puk hi a rulh tlak theih thu a tarlang a. He PMMY hmalakna hian scheme thenkhat angin Sorkar puihna a ken tel ve loh avangin rul thalo an awm anih chuan an lakah nakin hun zelah pawh bank chu a inkharkhip theih thu sawiin, loan diltute chu an rinawm a pawimawh thu a sawi bawk. Vawiin hun hi Pu R. Lalzarzova, RBI Branch Manager, Champhai chuan lawmthu sawiin a khar a ni.

PMMY hnuaiah hian loan chi thum pek theih a ni a. Chungte chu (i) Shishu (Rs. 50, 000 thleng) Eizawnna/ Business bultan tirte tan; (ii) Kishor (Rs. 50,000 Rs. 5 lacs) Business din fel tawh te tan; leh (iii) Tarun (Rs. 10 lacs thleng) Business ngelnghet tak nei tawh, tih len belh duhte tan a ni hlawm a. He scheme hnuaia loan puk te tan hian kum 5 chhung thleng rulh theih hun hi duan a ni a. Vawiina Champhai District-a a vawi khatna atana loan pekchhuah hi Shishu category vek niin, Mizoram Rural Bank hnuaiah mi 28, SBI Champhai Branch hnuaiah mi 25, SBI Khawzawl Branch hnuaiah mi 6, Canara Bank hnuaiah mi 5 leh Mizoram Cooperative Apex Bank hnuaiah mi 2 pek an ni a. Mi tam zawkin an lak theih nan hma lak zel a nih tur thu leh, an hmasawn dan azirin Shishu category mai bakah Kishor leh Tarun category loan te pawh peh chhoh dan tur ngaihtuah a la nih tur thu vawiin hian tarlan a ni.