Vawiin chawhnu ah khan 39 Assam Riffles’ Hall ah Assam Riffles Headquarter leh 23 Sector Assam Riffles Headquarter, Aizawl tangkawp ten Assam Riffles Ex- Servicemen Rally a buatsaih chu Mizoram Governor Lt Gen Nirbhay Sharma (Retd.) chuan a hmanpui.

Assam Riffles Ex-Servicemen Rally a thusawitu Governor Lt Gen Nirbhay Sharma (Retd.) chuan Mizoram a Ex-servicemen te chu an chenna hmun ah theuh mi te zah kai leh parawn kai an ni vek emaw tihtur in vantlang tan hna an thawk chhunzawm zui zel a hriat thu a tarlang a. Pension hnuah pawh ram tan leh khawtlang tan ‘Pension Rilru’ pu mai lova thawk chhunzawm tur leh Mizoram mipui te hnenah pawh India ram neitu diktak an nih zia hriattirtu ni turin a chah. Assam Riffles sipai leh an chhung te chu an thupui , “Tlangmi te thian” tih nunpui tura chah in an awmna hmun a piang ah khawtual mite nen inlaichinna tha siam tur leh mipui te tan thlamuanawm ni turin a fuih a ni.

Mizoram ah Rel kawng thuk zawk a rawn lut tur chu lawmawm a tih thu sawiin India ram tan, Rel chu mihring leh bungraw phurtu a nih piah lamah India ram ti pumkhattu a ni a ti a. India ram a lo chak zawk nan leh hma a sawn zual zel na tur in ramchhung mite rilru a thuhmun a pawimawh thu a tarlang a. Ex-Servicemen leh Sipai la tang mek te pawh in inpumkhatna kawnga mawhphurhna pawimawh tak neitute an ni tih an hriat a ngai a ti.

Assam Riffles Ex-Servicemen Rally ah hian Ex-Serviceman 3 te hnenah huaisen lawm Governor chuan a sem bakah Sipai Martar 3 nupui te hnenah lawmman a hlan bawk. Brig. MS Mokha, DIG, 23 Sector AR leh Col. Arjit Mukhopadhyay, Commandant 39 AR ten Ex-Servicemen Rally hi an kaihruai a. He hunah Ex-Servicemen te chuan infuihtharna hun neiin an pawl huang chhunga inkaihruai dan bakah an hmachhawp te sawihona an nei a ni.