2503/2024-2025

Aizawl, the 12th October, 2024: Mizoram Governor Dr. Hari Babu Kambhampati chuan vawiin khan Mizoram chhunga BRO project 1, Metre 125 a thui Ngengpuilui Bridge, Lawngtlai-Diltlang-Parva Road-a siam tiama  India ram State/UT hrang hrang 11 a Border Roads Organisation (BRO) project 75, cheng vaibelchhe 2236 senga siam hawnna hun chu Raj Bhavan atangin biak hmuh theihna kaltlangin a telpui a ni. Heng project hrang hrangte hi Defence Minister Pu Rajnath Singh chuan Sikkim atangin a rualin a hawng a, India ram tana tangkai taka hman turin a hlan a ni. 

BRO hmalakna project hrang hawn tak 75 zingah hian kawngpui 22, lei 51, helipad 1 leh chenna hmun 1 te a tel a. Hengte hi ramri dep hmun chhengchhia leh tlawhpawh harsa tak takahte din a ni hlawm a. Ram venhimna leh ramri dep hmun kilkhawr zawka inkalpawhna tihhmasawn nana ruahman a ni a. Ramri dep tihhmasawnna tur a nih mai bakah avela chengte dinhmun chawikan nana duan a ni bawk.  

Vawiina hawn tak BRO project 75 zinga 2 te hi Project Pushpak, Aizawl hmalaknate niin, Mizoram chhungah pakhat, Metre 125 a thui Ngengpuilui Bridge, Lawngtlai-Diltlang-Parva Road bakah Andaman and Nicobar Islands-a North-South Road-te a ni a. Ngengpuilui Leidawh hawn tak hian Parva leh a chhehvel Indo-Bangladesh leh Indo-Myanmar Border-ahte inkalpawhna tha zawk a pe thei dawn a ni. Project Pushpak, Aizawl chuan kum kalta chhung khan project 6; kawngpui 3 an siam bakah lei 3 an dawh zo a ni.