2504/2024-2025

Aizawl 12th October, 2024: Vawiin khan Lily Veng Cultural & Drama Club (LCDC) chuan an din champha vawi 25-na (Silver Jubilee) Chaltlang Tourist Lodge-ah an hmang a, PWD Minister Pu Vanlalhlana chuan khuallian niin he hun hi a hmanpui.

Khuallian Pu Vanlalhlana chuan LCDC-in kum 25 an tlin lawmna huna khuallian a sawm a ni chu lawmawm a tih thu sawiin a bial chhung mipuite duhsakna-ah a lawmin an hmalakna chu fakawm a tih thu a sawi a. Khawvel changkanna-in min chim lai mek a, Mizo nunze mawi leh kan Culture humhalhtu Club tha tak a ding chu chhuanawm a tiin kan culture chu kan nunhlui pholanna chauh a ni lova, kan hun lokal zel tur duangtu pawh a ni a ti. 

Mizoram Sorkar chuan kan flagship programme Bana Kaih Policy chu a taka kalpui turin September thla khan tlangzarh a ni a. Thalai, mahni kutke-a ding turte tan ruahmanna hrang hrang awmin cheng Nuai 50 thleng sumpai tanpuina pek theih a awm dawn a. Loan anga kalin Sorkar chu Guarantor-ah a tang dawn a, sum pai harsatna avanga Year of Consolidation-a kan puan avangin tun financial year-ah chuan Pilot project angin kan kalpui rih phawt dawn a ni a ti. 

Minister chuan Lily Veng Cultural & Drama Club member-te chu Mizo culture thangtharte'n an hriat theihna tura hmala zel tura chahin Ministry of Culture-a Scheme of Financial Assistance for Promotion of Art & Culture hnuaia Cultural Function Production Grant hmang te-in Fund haichhuah theih a awm a beisei thu sawiin, theihtawpa hmalakpui zel a tum thu a sawi a. Ram leh hnam hmelma  pathum, ruihhlo, AIDS, zuk leh hmuam lak atanga fihlim tur leh theihtawpchhuaha thangtharte kawngdik kawhhmuhtu ni zel turin a chah.

Pu Lalzuitluanga Advisor, LCDC pawhin thu sawiin kalkhawmte Jubilee lawmna chibai a buk a. Club thil tih reng reng chu tan hun dik tak leh Tawngtaina nen, an thiltih Pathian hnena an hlan zel thin avangin LCDC chuan malsawmna a dawn phah ni-a a ngaih thu a sawi a. LCDC hruaitu hluite atangin fuihna thu tha tak tak ngaihthlak a ni bawk a ni. 

LCDC hi kum 1999 a din niin club thupui chu 'thuawihna' tih a ni a. Club thil tum pathumte chu:

1. Mizo culture chawisan leh tihhmasawn

2. Drama chawisan leh tihhmasawn 

3. Thalaite nun kawng dik zawh tura kaihhruai te a ni. 

He hunah hian Club hruaitu hluite chawimawina hun hman niin an pawl hmalakna te leh an pawl activity hrang hrang hnam lam zir, hmanlai Mizo thawnthu insawisiak, Film Siam, Dance Video siam leh a dangte tarlan a ni.

LCDC Silver Jubilee lawmna hun hi Dr. H.Lalhmachhuana,  President, LCDC chuan kaihhruaiin inlawmna thu a sawi a. LCDC lo indin chhoh dan tlangpui a sawi lang bawk. Pu Lalhunruata, Vice President chuan hun tawp lawmthu sawina a nei bawk a ni. 

Nl. Priscilla Lallawmsangi, Gen. Secretary, LCDC chuan Report pein Kum 2003-ah Mizoram Drama Organisation (MIDO) hnuaia affiliation leh Kum 2005-ah Art & Culture Department, Govt. of Mizoram a recognition tih a nih thu a sawi a. Kum 2008-ah Song and Drama Division, Ministry of I&B, Govt. of India hnuaiah recognise ni lehin kum hnih danah recognition hi tihthar leh thin a nih thu a sawi a, Grade A artiste nihna te pawh an lo hauh ve tawh a ni. Kum 2010 khan Indian Council for Cultural Relations (ICCR), Ministry of External Affairs hnuaiah empanelled artiste an ni mek bawk. Report a tarlan danin LCDC chuan India ram pawn (Foreign)-ah vawi 2, India ram chhung hmun hrang hrangah vawi 73, Mizoram chhung hmun hrang hrangah vawi 70 leh Vengchhung local-ah vawi 199, an theihna leh thiamthil lam leh drama te an lo entir tawh a. Club member-te hi Lily Veng chhung mi, mahni duh thu a inpe te an la thin a, tunah hian member 66 an awm mek bakah veng hrang leh khaw hrang hrang atangin Club Artiste mi 50 chuang an nei deuh reng bawk a ni. Naupang leh thalai 300 chuang zet hnam lam leh drama an lo zirtir tawh bawk thu a tarlang.

He Jubilee lawmna-ah hian intihhlimna zai leh lam te thlirho a ngaihthlak niin tlai lamah chawihlui kilho nghal a ni a. Bialtu Minister, Vengchhung Local Council, YMA, MUP, MHIP leh hruaitu hluite'n  LCDC Jubilee lawmpuina atan hian thilpek an President hnenah an hlan a ni.