Vawiin khan Central Agriculture University, Imphal hnuaia College 12 te intawhkhawmna, ni thum awh tur, 5th Inter-collegiate Youth Festival, 2018 chu Auditorium, College of Veterinary  Science & Animal Husbandry( CVS & AH) ah hawn a ni a. He hun hi Governor Kummanam Rajasekharan chuan khuallian niin a hmanpui a ni.

Governor Kummanam Rajasekharan chuan Central Agriculture University, Imphal(CAU) thuneitute ten hmarchhak state hrang hranga  an zirlaite  tana   intawhkhawmna hun a siam chu inpumkhatna atana hmalakna tha tak a ni tih a sawi a. Zirna bakah mipuitling leh khua leh tui tha ni turin zirlaite chu chher an ngai tel bawk a ni a ti. India ram chu hnam hrangte chenhona hmun a nih angin hmasawna kawngah pawh inlungrualna nena pen ho dial dial a pawimawh hle a ni a ti.  India ram chu  Agriculture a innghat kan ni a. Agriculture University leh college te pawimawhna pawh mi zawng zawngin kan hrechiang em em a ni. Tuna zirmek te pawh mi tam tak zinga thlanchhuah an nih angin in zirlai lehkhathiam filawr tak tak a ni tih  chiang tawh tih a sawi a. Governor chuan India hmarchhak bial leh India ram pumpui tan CAU, Imphal hnuaia zirlai zawng zawng te chuan tan an  lak sauh sauha, mithiam rawn tlak, Agriculture & Allied sector atan mi tangkai tak leh thawhhlawk te an nih a ngai a ni a ti.

Dr. M. Premjit Singh, Vice Chancellor, CAU, Imphal pawhin thusawina hun a hmangin hmarchhak bial chhunga Agriculture & Allied Sector a hmalak chhoh tum dan te a sawi a. India sawrkar  hmathlirna zula hmalakna kal zelah India hmarchhak bial te  chu 'Green Revolution Vawihnihna'  thlenna hmun atan buatsaih mek a ni a. Organic Farming ngaih pawimawh bik niin Mizoram chhung bikah chuan kuthnathawktute ten ram zau tak an neih theih loh avangin sumchang thlai zingah pawh a man to deuh chi Sawhthing leh a dangte uar a pawimawh bik a ni a ti.

5th CAU inter- Collegiate Youth Festival, 2018 - 19 hawnna inkhawm hi Dr. Lalnuntluangi Hmar, Dean, CVs&AH, Selesih chuan a kaihruai a. He hunah hian Dr. Sobam Basanta Singh, Director of Instruction, CAU, Imphal  hnen atangin Festival buatsaih a nih dan leh CAU report tawi ngaihthlak a ni.  Tun dinhmunah CAU, Imphal hnuaiah hian State 7 - Arunachal Pradesh , Manipur, Meghalaya, Mizoram, Nagaland, Sikkim leh  Tripura-ah te Constituent College 13  leh Krishi Vigyan Kendra(KVK) 6 a awm mek a. Mizoramah chuan CVs & AH, Selesih leh Horticulture College, Thenzawl te chu CAU, Imphal hnuaia Constituent College te an ni a. CAU, Imphal hi kum 1993 January 26 khan din a ni a; kumin hi a din kum atanga chhiara  kum 25-na a ni a.  CAU, Imphal hnuaiah hian kum tin graduate zirlai 572, post graduate zirlai 267 leh Phd zirlai 72 tan seat a awm thin a ni. Tun tum CAU Inter- Collegiate Youth Festival-ah hian College 12 atangin zirlai 350 chuang zet an rawn tel a. Festival neih chhung hian Indoor discipline hrang hrangah  intihsiakna an nei dawn a ni