Mizoram Police chuan ni 16th November, 2018 (Zirtawpni) khan a hnuaia mi ang hian mipuite hria tur Thuchhuah a siam a ni :

INTHLANPUI HLAWHTLING TAK KAN NEIH THEIH NAN 

MIPUITE THLAWPNA KAN NGEN

Kan hma lawka Mizoram Inthlanpui, MLA General Election-2018 lo awm tur atan Mizoram Police Department chuan kawng hrang hrangin inbuatsaihna a kalpui mek zel a. State dang atanga Force duty turte pawh tluang taka lo thlengin, Duty hrang hrang heng - Static Surveillance Team, Flying Squad, Quick Response Team, Patrolling, Naka/Check Post, etc ah te pawh duty uluk takin kalpui mek zel a ni bawk. Inthlanpui hriattirna tihchhuah a nih atang khan Police-te leh sorkar hnathawkte chu India Constitution Article 324 angin ECI hnuaia thawk kan ni a.

Mizoram Police ten kan hmalakna hrang hrangah Ruihtheih thil, zu, drugs, pawisa leh a dangte dan lova zuar leh kengte dapa man zel a ni a. Tun thla khat leh a chanve chhung ringawt pawh hian hengte hi man niin a neitute thubuai siamsak an ni :

(1). Rakzu (LML) 4040.5 litres Rs.5,36,900 man hu te,

(2). Sapzu (IMFL) Rs.1,78,760 man hu te,

(3). Drugs/Methamphetamine 10.086 Kg Rs.2,12,10,000 man hu te,

(4). Heroin (No.4) 507.03 gms Rs.14,89,100 man hu te,

(5). Ganja 434.25gm Rs.3500 man hu te,

(6). India pawisa lem Rs.9,58,000 te

(7). Drugs hralhna man-pawisa Rs.73,2000 te man a ni a.

(8). Rakzu siamna (local factories) District hrang hranga hmun engemawzatah 42,580 litres, Rs.52,86,000 man hu te tih chhiat a ni tawh bawk.

Tin, Inthlan kaihhnawiha MCC bawhchhiatna pawh uluk taka vil reng a ni.

Mizoram mipuite tawiawmna zarah boruak muanawm tak kan nei chho mek zel a, Mipuite hnena kan ngenna ngai pawimawhin boruak duhawm lo, Law & Order problem lian tham leh Inthlanpui tisukuk thei tun thlenga a awm lo hi a lawmawm hle a ni. NGO hruaitute, MKHC leh Kohhran hruaitu, Pastor senior-te hmalaknaah pawh lawmthu kan sawi a. Ralmuang tak leh boruak tha tak hnuaiah Mizoram Inthlanpui hi kan neih ngei theih nan Police Department chuan Mipui, NGO hrang hrang te leh Political Party zawng zawngte tawimwmna kan ngen nawn leh a ni.