Vawiin khan Mizoram Governor  Lt General Nirbhay Sharma chuan Salvation Army, India Eastern Territory (IET) Centenery lawmna hun R. Dengthuama Multipurpose Hall, Mualpui Road, Salem Veng –ah a hmanpui. 

Lt Gen Nirbhay Sharma chuan Salvation Army-in  khawtlang leh ram tana a hnathawh te chu fakawm a tih thu a sawi a. An nupa in Salvation Army  rawngbawlna chu tha an tiin an thlawp tlat a, Salvation Army  programme-ah te an tel ve thin thu leh Raj Bhavan-a christmas carol buatsaihah  Salvation Army Band te chu sawm an nih thin thu te a sawi bawk a ni. Governor chuan kristian sakhua chu India rama sakhaw zuitu nei tamah pathumna anih thu leh a tam zawk te chu heng Nagaland, Megahalaya leh Mizoram-ah te hian an awm a ni, a ti. Kalkhawm te chu  Isua krista hnung zuia, mi hnuaihnung zawk, hnuchham leh baihvaite hmangaihna, thilphalna leh ngilneihna hmanga rawngbawl sak thin turin a chah a ni. Mizoram Governor chuan Mizorama pawl hrang hrang  te leh kohhrante chu nun hrisel zawk kan lo neih theihna atan tang ho tlata heng - damdawi hmansual, zu ngawlvei leh AIDS natna  te hi do tlat turin a chah nghal a ni. Lt Gen Nirbhay Sharma chuan Salvation Army India Eastern Territory in kum 100 a thleng chu rilru takin a lawmpui thu leh hemi hun hmang tura lokal General Andre Cox te nupa chungah lawmthu a sawi a, Centenery puala programme hman tur hrang hrang te chu a hlawhtlin zel theihna atan duhsakna a hlan a ni. 

Gen Andre Cox, Salvation Army General 20-na leh khawvel puma Salvation  Army hotu lu ber pawhin thu sawiin, Mizoram chu kum 2014- a an lokal tawh thu leh sawm nawnna an dawn pawh awlsam taka an pawm nghal mai thu a sawi a. Salvation Army member te chu mahni awm hmun atanga che chhuaka chanchintha hrila mite tanpui tur kan ni, a ti a. Thlirtu mai ni lovin a taka hnathawka sualna, retheihna, intluktlan lohna leh inhnuaichhiahna te do tlat turin member tin te chu a sawm nghal a ni. 

Salvation Army India Eastern Territory hi April 26, 1917 khan Lieutenant  Kawlkhuma hova din a ni a. June ni 1, 1991 khan Command hrangin a awm a, kum 1993 atang khan Territory ah hlankai a ni ve leh a ni. Mizoram chhungah rawngbawlna hrang hrang an kalpui mek a. Tun ah hian hnuchham enkawlna 6, mitdel te tan hostel 1 leh kum lama upa  enkawlna 1 an nei mek a ni. 

Centenery Celebration programme hi Commissioner Lalngaihawmi, Territorial Commander in a kaihruai a, Centenery Souvenir tlangzarhna Commissioner Nu-i, Zonal Secretary for Women’s Ministries, South Asia Zone in a nei a. He hunah hian sawrkar hotu te, kohhran dang hotu te leh Salvation Army Member thahnem tak  an kalkhawm a ni. Centenary lawmna programme hi April 25 -30 thleng awh tur a ni a, hemi hun chhung hian programme hrang hrang a awm dawn a ni.