Vawiin khan Rural Development Minister Pu R.Lalzirliana chuan Assembly Conference  Hall-ah Mahila Kisan Sashaktikaran Pariyojana (MKSP) leh Digital SHG Book Keeping System a hawng a. Hawnna inkhawm hi Parliamentary Secretary Pu Hmingdailova Khiangte, Pu Lalrinmawia Ralte MLA leh Pi C. Vanlalawmpuii MLA ten an hmanpui a ni. 

Pu R. Lalzirliana chuan MKSP leh Digital SHG Bookkeeping system hawn ani chu lawmawm a tih thu sawiin Mizoram State Rural Livelihood Mission-in thingtlanga mi harsa zawkte hmasawnna tura chak taka hma an la chu lawmawm a tih thu a sawi a.  Minister chuan MKSP tum ber chu thingtlang lo nei mite tan kalphung tha zawk leh daihrei zawk (sustainable agriculture) kawhhmuh, ranvulh kawnga hmasawn leh non-timber forest produce leh theirahte daih rei zawk tura senga enkawl zui leh thingtlang mite tharchhuah hralhna tur dap pui anih thu a sawi a. MKSP hmalakna hnuaia chhungkaw enkawlte sum lakluh alo puna eizawnna ngelnghet an lo neih phah ngei a beisei thu Minister chuan a sawi a. Fair chi hrang hrang bakah florist exhibition te neihna tur hmun leh kuthnathawktuten an kutchhuak an pholanna tur hmun tha tak neihna atan, NEDP hnuaiah hetiang hmun siam tura Agriculture Directorate sak that a nih tur thu Minister chuan sawiin kuthnathawktute hamthatna tura hma lak zel anih chu lawmawm a tih thu a sawi bawk a ni . 

Rural Development Minister chuan Mizorama Self Help Group-te data hrang hrang langtlang tak leh awlsam zawka lakkhawm anih theihna tura siam Digital SHG Book keeping System (e-SHG) chu tangkai taka hmang theuh turin kalkhawmte a chah a. Hlawhtling tur chuan dikna, felna leh rinawmna nen theihtawp chhuaha tan a ngai a ni, a ti. 

Mizorama MKSP bul tan nan Mizoram State Level Rural Livelihood Mission (MzSRLM) hnuaia Resource Block pali (4), Thingdawl, Bilkhawthlir, Serchhip leh East Lungdar RD Block te chu thlan an ni a, heng RD Block ah hian kum 3 chhung kal pui phawt tum a ni. Heng Resource Block atang hian MzSRLM hnuaia Self Help Group a tel, loneitu chhungkaw 5000 te chu MKSP huang chhunga enkawl tum niin kum 4-na atang chuan MzSRLM lo luh tawhna RD Block hrang hrangah he project hi tan leh tum a ni bawk a ni. 

Digital SHG Book keeping System (e-SHG) hi India ram puma SHG te sum chet vel dan langtlang taka en theihna tura duan a ni a. E-SHG hi “My SHG App” Ministry of Rural Development in a siam chu tablet emaw phone hmanga download in, village organisation tin ah hman tur a ni a. He app hmang hian SHG te sum leh pai hmuh dan leh hman dan te awlsam taka hriat theih ani dawn a ni. 

MKSP leh e-SHG hawnna inkhawm hi Rural Development Department Secretary, Pu Lalhmingthanga IAS-in kaihruaiin, Chief Operating Officer MzSRLM Pu Vanlalroluahpuia’n MKSP chungchangah presentation a pe a. Pi Ruth Lalawmpuii State Mission Manager –in Digital SHG Book keeping hman dan tur kimchang a sawi bawk a . He hunah hian Village Organisation aiawha khaw hrang hrang atanga lokal mi 64 hnenah e-SHG hmanna tur tablet sem nghal a ni.

Attachment

  • Loading attachment...