No.3021/2021-2022

Aizawl, 17th November, 2021 : Vawiin khan Mizoram Larsap Dr.Hari Babu Kambhampati chuan Central YMA Office Bearer te chu Raj Bhavan ah lengah sawmin YMA kalphung leh ram tana an rawngbawlna chungchangte sawihona leh inkawmna hun tha tak an nei a ni.

CYMA hruaitute chuan Mizoram leh hnam tana YMA in ke a pen dan leh a hnathawh hrang hrangte tarlangin Ramngaw leh nungchate humhalh na tura Environment & Forest Department te nena thawhho na te, Luitui leh luidung nungchate humhalhna tura Fisheries Department te nena hmalakna leh thawhhona te, Mizorama kawngpui tha nei tura PWD te nena thawh hona te, YMA Kumpuan Zirna uar kalpui mek te leh Mizorama zirna siamthatna tura rawtna hrang hrang a neih te chu Governor an hrilh a.

Mizorama Myanmar raltlante chungchang ah CYMA hruaitute chuan Central sawrkar atanga raltlante tanpuina leh chhawmdawlna emaw, anmahni ngaihsakna a awm lo chu pawi an tih thu Governor hnenah hian sawiin hemi kawngah hian Governor chu theihtawpa hma la turin an ngen a. Raltlante dinhmun hrechiang turin amah ngeiin an awmna hmun pawh tlawh ve turin an ngen bawk a ni.

CYMA hruaitute chuan Mizoram chu hmarchhak kilkhawra awm a ni a, Central sawrkar in a ngaihsak tawk lova an hriat thu leh Union Minister te pawhin an tlawh tam lo hle a an hriat thu an sawi a. Tun aia nasa zawka Central sawrkarin Mizoram rawn ngaihsak turin governor chu hma la turin an ngen a. India Danpui 8th Schedule ah Mizo tawng dah a nih ve theihna tura YMA in hma a lo lak tawh dan te chu Governor hnenah hian sawiin a hlawhtlin theih na tura theihtawp chhuapui turin an ngen bawk a ni.

Governor chuan Mizoram leh hnam tana YMA hnathawh lehkhawtlang tana a rawngbawlna hrang hrangte a lo hriat ve thu leh lawmawm a tih thu a sawi a . YMA hruaitute thu thlente chu a theih anga anga lo bawhzui pui a tum tih a sawi a ni.