3249/2024-2025

Aizawl, the 28th November, 2024: Mizoram Governor Dr. Hari Babu Kambhampati chuan vawiin chawhma khan Mizoram Chief Secretary thar Pu Khilli Ram Meena chu Raj Bhavan-ah kawmin Mizoram hmasawnna tura pawimawh hrang hrangte sawipuiin duhsakna a hlan.

Chief Secretary thar nena an inkawmna hunah hian Dr. Hari Babu Kambhampati chuan Sawrkar laipui Scheme pawimawh tak tak Mizoramin a tangkai pui theih turte ngaihven a tul thu sawiin, hmasawnna rahbi pawimawh tak tak zingah inkalpawhna kawngpui leh inbiakpawhna changtlung bakah power sector-a intodelh chu ngaihpawimawh hmasak ngai a nih thu a sawi a. Mizoram chu tourism sector-a theihna nasa tak nei a nih avangin India ram hmun danga awmte'n Mizoram leh ami chengte chungchang an hriat bela an tlawh tam zawk theih nan tanlak a tul hle a ni, a ti a. Mizoramah Helicopter service tangkai taka hman a nih dan leh indaihlohna awmte pawh UDAN Scheme leh ruahmanna dang awm theite dapa ngaihven a tul thu a sawi bawk.

Governor chuan Mizoram chu India rama State ralmuang ber, sik leh sa nuam, faina, ziak leh chhiar leh inthununna kawnga entawntlak a nih thu a sawi a. Sawrkar laipui hnuaia Infrastructure project lian tak tak thawh mekte, a bik takin kawngpui leh rail kawng sial mekte a hun takah tlo leh tha taka zawhfel a nih theih nan Department leh Agency kaihhnawihte tha taka kaihruaia a khat tawka meeting neia tan la turin Chief Secretary thar a chah a. Ram dang nena inkalpawhna leh insumdawntawnna kawngpui pawimawhte pawh ngaihven tlan a pawimawh thu a hrilh bawk.

He hunah hian Chief Secretary thar Pu Khilli Ram Meena chuan a hna lo thawh tawh dante Governor hi a hrilh a ni.

Chief Secretary thar hi 1993 Batch AGMUT Cadre IAS Officer niin, Sawrkar laipui Ministry of Minority Affairs Addl. Secretary dinhmun a chelh mek laiin Mizoram Chief Secretary tura ruat a ni. Nimin khan Aizawl lo thlengin Chief Minister pawh a lo hmu tawh bawk a ni.