3250/2024-2025

2024 Sahmulphah thla ni 28: Vawiin chhun khan Lunglei District Deputy Commissioner (Bawrhsap) thar Pi Navneet Mann chuan a office chamber-ah Lungleia tlawmngai pawl hrang hrang - Young Mizo Association (YMA), Lunglei Sub-Headquarters; Mizo Hmeichhe Insuihkhawm Pawl (MHIP), Lunglei Sub-Headquarters leh Mizo Upa Pawl (MUP), General Headquarters, Lunglei hruaitute leh kohhran hruaitute inhmelhriatna thingpui inpuiin, khawtlang thil pawimawh hrang hrang an sawi ho.

Lunglei District Bawrhsap Pi Navneet Mann chuan sawrkar leh khawtlang thil leh kawng hrang hrangah hmasawnna a awm theih nan thawh hona ṭha a pawimawh thu sawiin, Lunglei District Bawrhsap mawhphurhna thar a chelh rualin sawrkar hna thawkte bakah, tlawmngai pawl, kohhran, media leh mipui thawhpui tur ṭha tak tak a nei chu lawmawm a tih thu a sawi a. Mizoramah tlawmngai pawl leh kohhrante'n khawtlang ṭhatna turin nasa takin hna an thawk tih a hriat thu sawiin, kawng tam takah sawrkar chhawk zangkhaitu leh tha tichaktu an nih ṭhin angin district administration nena thawh hona pawh ṭha taka chhawm nun zel a nih a beisei thu a sawi a. District hmasawn nana hma lakna tur tam tak zingah hriselna, zirna leh kut hna thawktute chawi kanna lam chu nasa lehzuala bawhzui a tum thu sawiin, faina leh thianghlimna leh inkal pawhna kawngpui chungchangah pawh chak taka hma lak tum a nih thu a sawi a. Electoral roll revision kalpui mekah leh VC/LC inthlanpui lo awm turah tlawmngai pawl leh kohhrante thawhpuina leh ṭawiawmna ngenin, khawtlang ṭhatna tura thil pawimawh hrang hrangah amah finchhuah a, thurawn pe ṭhin turin a sawm a ni.

He inkawm honaah hian District Bawrhsap hi Additional Deputy Commissioner pahnih - Pu James Miahlung leh Pi Rochuangkimi Khenglawt te bakah, District Information & Public Relations Officer Pu C. Lalhruaitluanga te'n an ṭawiawm a. NGO leh kohhran hruaitute chuan Lunglei District hmasawn nana an ngaih pawimawh hrang hrang sawiin, district administration leh pawl hrang hrangte'n District hmasawnna tura thawh hona ṭha tak an neih theih nana thil pawimawh hrang hrangte sawi ho a ni bawk.