3081/2023-2024

Aizawl, 16.12.2023: Sawrkar laipui chuan hmalakna thar Viksit Bharat Sankalp Yatra duang in, hemi hnuaiah hian mipui hamthatna tur central scheme heng hrang te chu a dawng tu ten an dawn kim vek theihna turin khaw hrang hrang kal chilh a, hmun leh hmuna sawrkar department aiawh ten inhrilhriatna an kalpui mai bakah inziak thei ten hamthatna dawng tura an inziahluhna hun siam a ni dawn a. Chung atan chuan sawrkar laipuiin IEC (Information, Education & Communication) VAN 17 Mizoram a hman tur a rawn tir a. Larsap Dr. Hari Babu Kambhampati chuan MINECO Open Gym kawt atangin heng lirthei te hi vawiin tlai dar khan a vailiam a ni.

IEC van vailiam a nih hma hian Prime Minister Pu Narendra Modi hovin state panga - Rajasthan, Madhya Pradesh, Chhattisgarh, Telengana leh Mizoram tan he Viksit Bharat Sankalp Yatra tlangzarhna virtual programme neih a ni hmasa a. State panga te'n an awm hmun atangin he programme hi an chhim a; Prime Minister hian beneficiary  thenkhat a kawm bawk a. He scheme hi state dangah chuan kalpui tawh niin, General Elections avanga la kalpui theihlohna state panga tan vawiin virtual programme hi buatsaih a ni.

Virtual programme zawh hian Governor Dr. Hari Babu Kambhampati chuan khaw hrang hranga mipui hamthatna tur (welfare) scheme hrang hrang inhrilhriatna kalpui tur IEC van te hi a vailiam a. Aizawl district tan van 3 leh Lunglei district tan van 2 ruahman niin, district dang zawngah chuan van pakhat theuh tirh a ni a. Spare Van leh Recovery Van pakhat ve ve a awm bawk.

He inhrilhriatna hmalakna hi January ni 26 thleng a neih tur a ni a. IEC van ah hian driver bakah He hmalakna kaltlang hian rural scheme hrang hrang - PMJAY, Kisan Cedit Card, Har Ghar Jal - Jal Jeevan Mission, Jan Dhan Yojana, etc. leh urban scheme hrang hrang - PM Mudra Loan, AB-PMJAY, Khelo India, etc. te inhrilhriatna leh inziahluhna hun ruahman a ni ang.