No.5424/2020-2021

Aizawl, the 25th September 2020: Vawiin khan Banquet Hall, Raj Bhavan-ah mi tlemte a bik taka sawm te chauh telnaah Dr.Sushi Singh-in Lockdown chhunga lem ziah dan chi hrang hrang hmanga a ziah Lemziak 30 te Lehkhabua(catalogue) a siam, “A timeless Journey Towards Real Freedom” chu Governor P.S. Sreedharan Pillai chuan a tlangzarh a. Heng lemziak te hi Mizoram leh a chhunga chengte chungchang leh hlimthla te Lemziaktuin a hmuhdan tarlanna deuh vek a ni a; TV Screen-ah enho chhunzawm nghal a ni.

Lemziak tlangzarhtu, Governor P.S. Sreedharan Pillai chuan Corporate Social Responsibility(CSR) Advocator hlawhtling tak Dr Sushi Singh kutchhuakah te hian Mizo mipuite rilru thianghlimna, nelawmna leh hawihhawmna te fiah takin pholan a ni a. Dr. Sushi Singh hian hunreilote chhung chauh Mizoramah a pasal Pu SBK Singh, DGP a la rawn tawiawm rih a ni tih hriatloh khawpin Mizoram a hmu fiahin a ngaina hle tih a hriat a. A lemziak atang hian Mizo culture leh Mizoram chungchang midangte hriatthiam turin pholan a ni a; a lawmawm hle a ni a ti.

Sports Minister Pu Robert Romawia Royte pawhin thusawina hun neiin Dr Sushi Singh chuan Mizoram mipui rawngbawlsak kawngah a pasal Pu SBK Singh, DGP a tawiawm tha mai ni lovin a lemziak te hmangin midangte hnena Mizo Culture hriattirna kawngah hna tha tak a thawk a ni a ti a. Dr. Sushi chu mi talent nei tha tak nia a lo hriat thu leh infiamna huangah pawh hlawhtlina tam tak lo nei tawh a nih tho avangin Sports huangah te pawh mi tangkai rawn nih tum turin a sawm bawk a ni.

Thusawitu dang Pu Lalnunmawia Chuaungo, Chief Secretary chuan Lockdown chhunga Dr Sushi Singh-i hlawhtlina atang hian kan hun tawng a piang te hi hlawk thlak takin kan hmang vek thei tih a lang chiang hle tih a sawi a. Vawiina Governor-in a tlangzarh lemziakte chu a ziaktuin Mizoram a chhuah hunah pawh hriat chhunzawm reng a ni tawh dawn a ni a ti a. Lemziaktu chu lemziak hmanga Mizo Culture leh Mizoram chungchang pholang chunzawm turin a chah bawk a ni.

Vawiina Dr Sushi Singh lemziak tlangzarhnaah hian Home Minister Pu Lalchamliana te, Pu J.C. Ramthanga, Additional Chief Secretary to Chief Minister leh sawmbik te an tel a ni. Lemziak tlangzarhnaah hian Dr. Sushi Singh hnen atangin Lemziak tura thutlukna siam chhan leh a lemziakte chu Mizoram leh Mizo Culture a hmuhdan tarlanna a nih dan te ngaihthlak a ni a. Lemziak te hi a vaiin 30 a ni a; Pencil-charcoal, water colour, acrylic-canvas leh knife painting hmanga ziah te an ni a. Hun tawp hi Pu SBK Singh, DGP chuan lawmthu sawina neiin a khar thung a ni.