No.5423/2020-2021

Dated Serchhip, the 25th September, 2020: Vawiin hian Serchhip Khawtetlanga Judicial Officers’ Residential Complex chu Hon’ble Mr. Justice Michael Zothankhuma, Judge, Gauhati High Court leh Hon’ble Mr. Justice Nelson Sailo, Judge Gauhait High Court, Portfolio Judge for Serchhip District ten an hawng.

A hawnna inkhawm tawi hi he Residential Complex ah hian buatsaih niin Pu. Joel Joseph Denga, District & Sessions Judge, Aizawl Judicial District in a kaihruaia. Justice Michael Zothankhuma chuan thusawiin, helai hmunah Complex ram tha tak an neih theih nana tha thawhtute zawng zawng chungah lawmthu sawiin, building mawi, nalh leh hmunhma nuam taka sak saktu Mizoram PWD chungah lawmthu a sawi a ni. Justice Nelson Sailo pawhin thusawiin, Serchhip district in Jail, Court building mai bakah Judicial Officer te chenna complex tha leh nalh tak a nei ta chu district tan hmasawnna chhinchhiah tlak tak nia a hriat thu a sawi a. Heng hmunhma zawng zawngte hi mipuite ta, mipuite tana din leh siam anih angin, mipuiten duat taka min enkawlpui turin ka ngen cheu a ni a ti.

He hunah hian Er. Lalsangliana Chhakchhuak, SE, Project Circle, PWD, Aizawl chuan a sak dan chungchang report a pe a. Complex ah hian Quarters grade I, Grade II leh Grade III te sak niin sum sanction zawng zawng zat chu Rs. 422.70 Lakh a nih thu leh Sanction zat hian fel taka sak zawh a nih thu a tarlang. Grade I satu hi Bawithanga, Electric Veng, Aizawl a ni a, Grade II satu hi Ralzatawna, Serchhip Bazar Veng a ni a, Grade III satu hi PC Vanlalsawma, Serchhip Venglai niin Fencing hi Zahnuna, Zemabawk a ni a, Approach road leh a tualzawl erawh Department in an thawk thung. Ni 1.8.2018 ah hna hi tan a ni a, ni 1.2.2020 ah thawh zawh fel a ni.

Vawiina Serchhip Judicial Officer Residential Complex hawnna inkhawm hi Pu C. Lalramzauva, Sr. Advocate, Adviser to CM te, Pi Marli Vankung, Secretary, Law & Judicial, PAD, Pi Helen Dawngliani, Registrar, Gauhati High Court Aizawl bench te leh Law & Judicial Official pawimawh dangte, Gauhati High Court, Aizawl Bench a thawktute leh mi pawimawh dangte an tel a. Pu Kumar Abhishek, IAS, DC Serchhip te, Pu R. Sathiyasundaram, IPS, SP te leh district officers pawimawh engemawzatin an telpui bawk.

Pu Kumar Abhishek, IAS, DC Serchhip in lawmthu sawina hun hmangin programme hi a khar a ni.