478/2022-2023

Aizawl, 12^th May 2022: Vawiin chawhma khan Information & Communication Technology (ICT) Department in a buatsaihin  ‘Government Online Excellence Awards 2021-2022’ hlanna leh ‘Web Monitoring System’ leh ‘Online Domain Registration System’ tlangzarh hun neih a ni a. Governor Hari Babu Kambhampati chu Khuallian  a ni a.  ICT Minister Pu Robert Romawia Royte chu khualzahawm a ni thung.

He hunah hian Governor Hari Babu Kambhampati chuan ICT in a buatsaih ‘Web Monitoring System’ leh ‘Online Domain Registration System’ a tlangzarh a.  ICT in endiktuke a ruat te kaltlanga online IT services hmang tha zual Category 4 ah online IT service hmangtu office leh institution 334  atanga thlan chhuah te hnenah lawman a sem nghal bawk a ni.

Governor Hari Babu Kambhampati chuan tunah hian digital khawvel, Information Technology khawvel leh internet leh nertworking hmanga engkim thlun zawm vek khawvel kan chek mek a. Kan nitin nunah  IT leh networking tellovin a khawsak theih tawh lo a. IT hmang thiam leh hmang nasa apiang te khawsak a awlsamin an changkang zawk a ni a ti. Mipui te tana awlsam zawka sawrkar office te dawr a nih theih nan IT lamah department ten inhmasawn siak an tum a ngai a. Website te kaltlang information entheih mai ni lovin fee te pek theih a a awm a, dilna te thehluh theih a awm theih  leh zawhna te a zawh theih a ngai tawh a ni a ti. ICT Department in Department te fuihna leh chawhphurna nip ah fawma Department thawk tha te chawimawina chang a hria chu lawm a tih thu a sawi a. Department tam zawk te pawh vawiin atanga IT hman kawnga tan rawn la thar leh turin a chah a ni.

Sawrkar  department ten an website an enkawl that chuan office dawr tulna tam tak chu online hmangin a chinfel theih a. Hei hian sum, tha leh hun atana senso nasa takin a dawrtute tan a ti hniam thei a. Central Sawrkar pawhin IT hmanga hnathawh hi a duh dan leh a kalpui mek a ni a. Scholarship te, Beneficiary te dawn tur pawisa, etc., te pawh Direct Beneficiary Transfer (DBT) hmangin a dawng tur te hnenah a thlentir vek tawh a. Hei hian langtlang sawrkar a siam a, corruption a ti ziaawm a ni a ti. Hetiang bawkin tuna Department in mipui rawng a bawlna huanga mipuiin office an dawr a tulna te hi online hmangin a thlak theih a, office dawr mamawh ten an mahni inlum atangin office an dawr thei dawn a ni a ti. He hunah hian Governor chuan sawrkar official kalkhawm te hnenah  Mizoram mipuiin an dawn tur scheme tha tak tak  an la hre tawk lo tih a  hriathu  a sawi a. Scheme tha tak tak Mizoram mipui tamzawkin an hriat theih nan sawrkar hnathawkte chu tan la turin a fuih a. Pradhan Mantri Jan Dhan Yojana, Pradhan Mantri Jeevan Jyoti Bima Yojana, Pradhan Mantri Suraksha Bima Yojana, Atal Pension Yojana, Pradhan Mantri Ujjwala Yojana, etc,..te hi a zinna ah te a zawt thin a, a hria an awm mang loh thu leh a inleng mipui vantlang hruaitute pawn an hre lo deuh zel a ni tih a sawi a. Official ten heng welfare scheme tha tak tak te hi mipui an zirtir uar a tul takzet a ni a ti.

ICT Minister Pu Robert Romawia Royte chuan e-governance hmanga Mizoram sawrkar hnuaia Department hrang hrang te tih hmasawn hna thawk turin ICT leh Mizoram State e-Governance Society(MSeGS) chu thawktu tlemte leh budget lian lo tak nen tan a la hle a. An resource ngaihtuah chuan an hlawhtlinna lian hle nia a hriat thu leh a chuan thu a sawi a. ICT Minister chuan, ICT Department chuan sawrkar hnuaia Department, Office leh Institution hrang hrangten an hman tur system tha tak Government of Mizoram Content Management System (GoM-CMS) a siam a, he CMS hmang hian website engemaw zat enkawl a ni a ti a. Sawrkar Department, Office leh institution ten mipui hnenah Sawrkar hmalakna information dik an pek chhuah theihna turin website-te hi uluk taka enkawl a, mipui tana tangkai tur information dah chhuah thin chu Sawrkar Department-te mawhphurhna a nih thu a tarlang bawk. Hei bakah hian Department leh Institution-te zingah Website update thalo leh information kimchang dahlo-te an awm thin avangin GAD (General Administration Department) leh ICT Department-te tangkawp chuan Mizoram Sawrkar hnuaia Websites zawng zawngte, Website Monitoring Tools hmangin a vil reng tawh dawn thu a sawi a. Tunah hian ICT Department hian Website 334 a host mek tih a sawi lang bawk a ni.

Department te chuan Website enkawl, application software siam leh IT kaihhnawih mamawhna dangah ICT rawn punna chang hre turin a chah a. Sawrkar Department leh Institution lian deuh te bakah Sawrkar School hrang hranga pawh ICT chuan zirlaite IT thiamna kawnga tat hriam turin computer bungrua te pein hma a la mek a. High School thlanchhuah bikah te pawh a bul tan nan Smart Class kalpui tum a ni a ti.

IT leh Social Media chu tangkai tak a nih rualin hmansual chuan a hlauhin pawi lian tak a khawih thei a. Tunah hian IT hmansual avangin pawisawilo tam takin tawrhna leh mualphona te an tawk mek a, a pawi takzet a. IT thatna chu sawitam ngai lova kan hriatthiam lain a thatlohna hi kan chian a hun tawh hle a ni a ti. IT thiamna chu a hmasawn zawnga hmang tur leh a thatlohna te hrethiam turin ICT department leh Police te pawhin tan an la viau nachungin a hmangtute  chhia leh tha hriatna erawh a pawimawh lai ber a ni zawk a ni a ti. 

Dr. Renu Sharma, Chief Secretary leh ICT Department Secretary ni bawk chuan an hun hlu tak senga lo kalkhawmte lawmna thu sawiin, Sawrkar Department, Office leh Institution ten tangkai leh zual zawk a mipui rawngbawl nan leh Service hrang hrangte pek chhuah nan Website hmang turin a duh thu a sawi a. Website tam zawk chu cheimawi, mahni department fakna mai mai leh tangkaina em em nei lo te an ni a ti a. Website chuan information a pe anga, zawhna leh chhanna te a awm anga, pawisa(fee) te a thehluh theih anga, dilna te leh thil tul dang service te pawh a pe tur a ni a ti.

Pu C. Lalrinfela, Informatics Officer, ICT Department chuan Government Online Excellence Awards 2021-2022 buatsaih a nih dan chungchang leh Web Monitoring System leh Online Domain Registration System siam a nih dan te sawifiah in Technical Report a pe a. Web Monitoring System hi ICT Department leh General Administration Department (GAD) te hmalakna intawm a siam Online Analytical Software (https://cmsmonitor.mizoram.gov.in) a ni a, he Monitoring System hmang hian ICT Department website host zawng zawngte chu nitin-a Website an update dan, thlakhat chhunga website an update dan leh kumkhat chhunga Website an update dan zawng zawng en theih in a awm vek a ni. He monitoring kaltlang a performance Reports hi Mizoram Sawrkar-a Secretaries meeting in an review theih tura ruahman a ni.  ICT Department in Sawrkar Department/Office te tana service an pek thin pawimawh tak zing a mi Domain Registration pawh Online hmanga tih theih turin Online Domain Registration System tlangzarh a ni a, vawiin atanga hman tan nghal turin Online hmangin Sawrkar Department, Office, Institution leh PSU hrang hrang ten website domain registration an dil thei tawh dawn a, https://dictonline.mizoram.gov.in kaltlangin domain registration hi dil theih a ni ang. 

Government Online Excellence Awards 2021-2022 atan hian Sawrkar in Guidelines felfai tak a siam a, he Guidelines ang hian lawmman dawng turte thlangtu Committee pahnih din a ni a; ICT Minister Chairman na hnuaiah Selection Committee leh Chief Informatics Officer, ICT Department Chairman na hnuaiah Technical Evaluation Committee din a ni. Heng Committee te hian Guidelines angin lawmman Category 4 (pali) siamin a dawngtu turte an thlang a ni.

Category-I           :              Official Department Website

Category-II         :              Official Institution Website

Category-III        :              Best Online Service Initiatives

Category-IV        :              Special Recognition

Technical Evaluation Committee in Sawrkar Department/Office Website 89 (sawmriat pakua) leh Zirna In kaihnawih Website 41 (sawmli pakhat) te a endik a, Category-I leh II hnuaia a ti tha zual Top-10 lawmman dawng tur Category-I ah 12 (sawm pahnih) leh Category-II ah 13 (sawm pathum) te thlan chhuah an ni. Category-III Online Services category hnuaiah a ti tha Top-5 ah Department, Office, Institutions 6 (paruk) thlan an ni a. Tin, Category-IV Special recognition award dawng turin Category-I, II leh III huam telloh te atangin Department/Office 6 (paruk) thlan chhuah an ni bawk a ni.

Category I, II leh III hnuaia lawmman hi Mizoram Governor leh ICT Minister ten an sem a, Top-3 te hnenah Memento leh Certificate hlan niin, a dangte hnenah Certificate an hlan bawk. Category-IV hnuaia lawmman dawngtute hnenah Mizoram Chief Secretary in Certificate a hlan bawk a ni. Lawmman hrang hrang dawng tute chu a hnuai ami tehi an ni:

 He hun ah hian Sawrkar mi pawimawh hrang hrangte leh Department/ Office hrang hranga Website enkawl tu thahnem tak an tel a. Dr. Lalthlamuana, Chief Informatics Officer, ICT Department chuan lawmthu sawiin hun a khar a ni.