3608/2024-2025

Aizawl, the 2nd December, 2024: Mizoram Governor Dr. Hari Babu Kambhampati chuan vawiin chawhma dar 11:00 khan Health & Family Welfare Minister Pi Lalrinpuii, Adviser to CM (Finance & Planning) Pu TBC Lalvenchhunga, ZMC Director Dr. John Zohmingthanga leh Dr. Haroon M. Pillay, Neurosurgeon, Silverline Hospital, Kochi-te chu Raj Bhavan-ah kawmin Zoram Medical College (ZMC) a Neurosurgery Department din a nih theih dan tur chungchang a sawipui.

Governor Dr. Hari Babu Kambhampati chuan CSR fund-te hmasawnna ruhrel siam nana chhawr tangkai a pawimawh thu sawiin, zirna, hriselna leh adangahte pawh CSR fund hai chhuah a nih theih nan Public Sector Undertaking (PSU) hrang hrangah rawtnate thlen zung zung a tul thu a sawi a. Prime Minister-in PSU te chu NE State tan an CSR fund-te hmang uar tura a chah thu pawh sawiin, hei hi remchangah hmanga fund hai chhuah dan kawng kan ngaihven nasat lehzual a tul hle a ni, a ti bawk.

Health Minister Pi Lalrinpuii chuan hrilselna kawnga hmasawnna tura theihtawp chhuah mek zel a nih thu sawiin, ZMC-ah Neurosurgery Department awm theih nana hmalak mek bakah Cardiothoraco Vascular Surgery OT Unit, IVF Centre leh tul dangte a awm thei nana tanlak chhunzawm zel a pawimawh thu a sawi a. Health infrastructure tihchangtlun a nih theih nana Governor hmalakna leh thahnemngaihna chu fakawm a tih thu a sawi bawk.

He hunah hian Mizoram mipuite mamawh em em Neurosurgery Department ZMC-a hawn a nih theih nana hmalak tul hrang hrangte sawi ho a ni a. Hmunhma thuhlaah harsatna a awm loh thu tarlan niin, hemi atana sum mamawh zat tur leh detailed project proposal siamte thlirhoa pawm a ni a. Hemi tur hian Indian Oil Corporation Ltd. (IOCL) te inhuam angin CSR fund dil ni se, a ranglamin detailed project proposal thawna ngaihven zui ni se tih a ni.