3609/2024-2025

2024 Pawltlak thla ni 2 : Vawiin khan Lunglei District Level Committee on Swachhata Green Leaf Rating (SGLR) leh District Water & Sanitation Committee (DWSC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. Thli leh bawlhhlawh sawngbawl leh thehthang kawnga Lunglei District chhunga khualbuk (hotel/homestay/government accommodation) te thliar hranna (rating) pek chungchang leh world toilet day campaign chungchang an sawi ho.

Sawrkar laipui Ministry of Jal Shakti hnuaia Department of Drinking Water & Sanitation leh Ministry of Tourism te ṭang kawpin India rama khualbukte'n thianghlimna leh hriselna kawnga hma an sawn theih nana an chet thianghlim dan azira thliar hranna, Swachhata Green Leaf Rating (SGLR) kalpui tura an ruahman angin Lunglei District-a khualbukte chu Sub-Divisional Officer (Sadar) kaihhruaina hnuaiah Verification Sub-Committee chuan October ni 8 - 14, 2024 chhung khan a hmunah kal chilhin an endik a. Lunglei District chhunga khualbuk 13 endik niin, inthiarna thli (faecal sludge), bawlhhlawh sakhat (solid waste) leh tuichhia (grey water) an sawngbawl leh thehthang dan azir te'n mark leh rating pek an ni a. Rating hi chi thum - (a hniam lam aṭangin) 1 Leaf, 3 Leaf leh 5 Leaf awmin, Lunglei District-a khualbuk pali - Circuit House Lunglei, Tourist Lodge Zotlang, Hotel Malawm leh Ono Hotel te chu 3 Leaf rating pek niin, khualbuk pahnih - Elite Hotel leh Hotel Albasta te chu 1 Leaf rating pek an ni thung a. Verification Sub-Committee te'n rating an pek hi vawiin khan District Level Committee chuan pawmpuiin, rating hmu sate'n rating sang zawk an hmuh theih nan leh rating la hmu pha lote'n an hmuh ve theih nan theih tawpa hma lak zui an rel a ni.

He hunah hian November ni 19, "World Toilet Day" puala mipuite'n inthiarna in ṭha leh thianghlim an ngaih pawimawh zel theih nana inzirtirna beihpui thlak (campaign) kalpui mek chungchang sawi ho a ni bawk a. He campaign hi November ni 19 - December ni 10, 2024 chhunga kalpui tur niin, mimal leh vantlang inthiarna thawm ṭhat leh cheibawl hna thawh nan te, ek in him ṭha pawimawhna uar zawka inzirtirna hun atan te ruahman a ni a. Lunglei District-ah chuan inzirtirna hrang hrang kalpui rual hian thingtlang (rural area)-a vantlang inthiarna hmun (community sanitary complex - CSC) 21 te tan inelna buatsaih tum niin, RD block tin aṭangin CSC ṭha pahnih ṭheuh thlang chhuak hmasain, chumi aṭang chuan Lunglei District-a CSC ṭha ber ber pathum thlan chhuah leh tum a ni a. Campaign khar ni, December ni 10, 2024 (Human Rights Day)-ah lawmman inhlan a ni ang.

Vawiin ṭhut khawmah hian faina leh thianghlimna kawnga hma lakna tur leh hmasawnna tur hrang hrangte sawi ho ni bawkin, Lunglei District thingtlang khuate tana bawlhhlawh thliar leh sawngbawlna (solid waste management) hmun ruahman a nih theih nana hma lak rel a ni bawk.