3610/2024-2025

AIzawl the 2nd December, 2024 : Vawiin December ni 2 (Thawhtanni) hi National Pollution Control Day a ni a, India ram pumah ropui taka lawm niin faina leh thianghlimna kawnga inzirtirna leh a taka thawk chhuakin hun hman a ni. Mizoramah chuan Mizoram Pollution Control Board (MPCB) hmalâkna-in district hrang hrangah he hun hi hman a ni.

He Pollution Control Day denchhen hian Mizoram district hrang hrangah a rualin District Education Office (DEO) leh MPCB kaihhruainain School Eco-Club naupangte nen a huhoa kawngpui leh lui dung then fai hnatlâng rûnpui neih a ni a, mi 5000 chuang lai an thawkchhuak thei a ni.

Aizawl-ah chuan MPCB staff-te leh sikul thlanchhuah bîka Eco Club member-te’n Tuikual lui, Lawibual lui leh Chite luia hmankhat daih sarâng lam bawlhhlawhte chharin an hnatlâng a, hêng an bawlhhlawh chhar khâwmte hi Tuiriala bawlhhlawh paihna hmunah an paih fel nghal bawk a ni.

Kum 2024 National Pollution Control Day pual hian MPCB chuan ‘Clean Air, Green Earth’ tih thupui hmangin Photography Competition an buatsaih mêk bawk a, Online Poster Making Competition-te buatsaih bawkin boruak thianghlim (clean air) pawimawhzia inzirtir/inhrilh hriat nân Public campaign November ni 30 (Inrinni) zîngkârah khân Mizoram University Eco-Club member-te nen hlawhtling taka buatsaih a ni bawk.

MPCB hian mipuite hnêna thuchah tichhuakin MPCB Chairman Pu Liankima Lailung (IFS Rtd.) chuan thangthar lo la awm leh zêl turte tâna chênna tlâk khawvêl kan hnutchhiah theihna turin tuna chêng mêkte hian uluk taka kan enkawl a tûl thu a sawi a, MPCB Member Secretary Pu C. Lalduhawma pawhin India ram khawpui zînga boruak thianghlim ber kan nih mêkna vawnghim zêla hâlpuah leh bawlhhlawhte hâl mai mai lo turin mi tinte min ngên bawk a ni.

National Pollution Control Day hi kum tin December ni 2-ah hman țhin a ni a, he ni hi kum 1984-a Bhopal Gas Tragedy-a nun chân tâ-te hriat reng nâna tih niin mipuite hnêna pollution chungchâng inzirtir nân leh environment humhima tibawlhhlawh (pollute)-lo zâwnga khawsa tura infuih thar nâna hman țhin a ni.